Burundidəki Konqo qaçqınlarına ərzaq yardımı üçün 30 milyon dollar tələb olunur

BMT-nin Ümumdünya Ərzaq Proqramının (ÜƏP) 2027-ci ilin birinci yarısında Burundidə Konqo Demokratik Respublikasından (KDR) olan qaçqınlara ərzaq yardımı göstərməyə davam etməsi üçün 30 milyon dollardan çox vəsaitə ehtiyacı var.

Operativ Media-nın "Africanews"a istinadən məlumatına görə, bu barədə ÜƏP-in nümayəndəsi Jan de Lestranj bildirib.

Təşkilat əvvəllər maliyyə çatışmazlığı səbəbindən ərzaq çatdırılmasının oktyabrdan etibarən dayandırıla biləcəyi barədə xəbərdarlıq edib. Beynəlxalq donorların və Burundi hökumətinin köməyi sayəsində bunun qarşısı alınıb, lakin ayrılan vəsait yalnız bir neçə ay davam edəcək.

ÜƏP-in hesablamalarına görə, Burundidəki Konqo qaçqınlarına ərzaq yardımının aylıq dəyəri təxminən 5 milyon dollardır. Bu məbləğin 1 milyon dolları ölkənin şərqindəki Busuma düşərgəsinin sakinlərini dəstəkləmək üçün lazımdır. Hər bir qaçqın aylıq təxminən 38 000 Burundi frankı (12 dollar) məbləğində yardım alır.

2025-ci ilin dekabrında açılan Busuma düşərgəsində Konqo Demokratik Respublikasından təxminən 33 000 nəfər yaşayır. Onlar ərzaq çatışmazlığı ilə yanaşı, güclü küləklər və zədələnmiş çadırlar səbəbindən daha da ağır yaşayış şəraiti ilə üzləşirlər.

BMT-nin Qaçqınlar üzrə Ali Komissarlığının məlumatına görə, artıq 22 000-dən çox insan Burundidən Konqo Demokratik Respublikasına qayıdıb. Lakin Konqonun şərqində davam edən döyüşlər qalan qaçqınların geri qayıtmasına mane olur.