ABŞ-nin İsraildəki səfirliyi Yəməndə vəziyyətin gərginləşməsi fonunda Yaxın Şərqdə təhlükəsizlik risklərinin artması barədə vətəndaşlarına xəbərdarlıq edib. Diplomatlar regionda aviareyslərin ləğvi, hava məkanlarının bağlanması və nəqliyyat əlaqələrində fasilələrin yaranmasının mümkün olduğunu bildiriblər.
Operativ Media xəbər verir ki, səfirliyin rəsmi saytında yayımlanan məlumatda Yaxın Şərqdə olan ABŞ vətəndaşlarına təhlükəsizlik vəziyyətini diqqətlə izləmək və ehtiyatlı davranmaq tövsiyə olunub.
Diplomatik nümayəndəlikdən bildirilib ki, Yəməndəki qarşıdurmanın genişlənməsi mülki hava limanları və digər mühüm infrastruktur obyektləri üçün də təhlükə yaradır. ABŞ diplomatları hərbi əməliyyatların qısa müddətdə daha da şiddətlənə biləcəyini istisna etməyiblər.
Xəbərdarlıq Yəməndə “Ənsar Allah” hərəkatının (husilərin) hökumət qüvvələri və onları dəstəkləyən Səudiyyə Ərəbistanı ilə qarşıdurması fonunda verilib. ABŞ tərəfinin iddiasına görə, İran husilərə dəstək göstərir.
Bununla yanaşı, ABŞ-nin Qüdsdəki səfirliyinin və Təl-Əvivdəki konsulluq şöbəsinin fəaliyyətini adi qaydada davam etdirdiyi, Amerika vətəndaşlarına konsulluq xidmətlərinin tam həcmdə göstərildiyi qeyd olunub.
Yəməndə husilərlə Səudiyyə Ərəbistanının dəstəklədiyi hökumət qüvvələri arasında silahlı qarşıdurma 2014-cü ilin avqustundan davam edir. İyul ayında husilər Səudiyyə Ərəbistanına qarşı dəniz blokadası tətbiq etdiklərini açıqlayıb və ölkəyə məxsus bir neçə neft tankerinə hücum ediblər.
Avqustun əvvəlində “Ənsar Allah” hərəkatı Yəmənin cənub-qərbində hücuma başlayıb. Sentyabrın 10-11-də isə Moxa liman şəhərinə və Bab əl-Məndəb boğazı yaxınlığındakı ərazilərə nəzarəti ələ keçirib.
Oktyabrın 4-də Yəmən hökumət qüvvələri üsyançıların nəzarətində olan əraziləri geri qaytarmaq məqsədilə genişmiqyaslı hərbi əməliyyata başladıqlarını elan ediblər.
