“Beynəlxalq təşkilatlar və aparıcı dövlətlərin Qarabağdakı qondarma “seçkilərə” reaksiyası gözlənilən idi”- siyasi şərhçi

“Ermənistan Qarabağda qondarma "respublika" qurub ona "prezident" seçməklə məsələnin həll olunmayacağını bilməli idi. Aparıcı dövlətlər Arayiki saymadıqları kimi, Şahramanyanı da saymayacaqlar. Yəni sivil dünya separatizmi tanımır və heç vaxt tanımayacaq”.

Bu sözləri “Operativ Media”ya açıqlamasında siyasi şərhçi Aydın Quliyev bildirib.

Aydın Quliyevin sözlərinə görə, Ermənistan elə bilirdi ki, müəyyən dairələrdən dəstək alacaq, amma bu dəfə də planları işə yaramadı.

"Bütün nüfuzlu beynəlxalq təşkilatlar, hətta Ermənistana yaxın olan dövlətlər də bu seçkinin nəticələrini tanımadılar. Çünki ortada bir məntiq var. Məntiq də ondan ibarətdir ki, Ermənistan Azərbaycanın ərazi bütövlüyünü tanıyıb, Qarabağı Azərbaycan torpağı kimi tanıyıbsa, burda sizin keçirdiyiniz "seçki" nə deməkdir? Dünya başa düşür ki, artıq məğlub Azərbaycanla yox,  qalib Azərbaycanı qarşılarında görürlər".

Aydın Quliyevin sözlərinə görə, qondarma rejimin qondarma "prezidenti" vəzifəsinə Şahramanyanın gəlməsi təsadüfi deyil, o müəyyən dairələrdən dəstək alır.

"Şahramanyanın hakimiyyətə gətirilməsində həm beynəlxalq dairələrin iştirakı var, həm də  Ermənistan hakimiyyətindəki köhnə revanşist qüvvələrin. Şahramanyanın daha aqressiv, daha pozucu siyasi mövqe nümayiş etdirməsi o deməkdir ki, o Ermənistandakı revanşistlərə daha çox yaxındır. Hər halda ümidsiz çırpıntılardır. Heç bir perspektivi yoxdur. Prezident İlham Əliyevin də dəfələrlə qeyd etdiyi kimi Azərbaycanın suverenliyi və ərazi bütövlüyü müzakirə mövzusu deyil. Mövqeyimiz prinsipal və dəyişməzdir”.