"Rusiya tərəfi humanitar yüklərin daşınması üçün Laçın və Ağdam marşrutlarının paralel açılması ilə bağlı Rusiya Federasiyasının Xarici İşlər Naziri S.V.Lavrovun təşəbbüsü əsasında Qarabağdakı çətin humanitar vəziyyətin həllinə yardım etməkdə davam edir".

"Operativ Media" xəbər verir ki, bu barədə Rusiya Xarici İşlər Nazirliyinin sözçüsü Mariya Zaxarova bildirib.

O qeyd edib ki, sentyabrın 18-də Rusiya sülhməramlı kontingentinin və Rusiya Xarici İşlər Nazirliyinin iştirakı ilə Beynəlxalq Qızıl Xaç Komitəsinin səyləri nəticəsində hər iki istiqamətdən eyni vaxtda regiona ərzaq və dərman partiyaları çatdırılıb.

"Biz yerli əhalinin maraqları naminə maneəsiz və müntəzəm humanitar yardımların davam etdirilməsini gözləyirik. Ümid edirik ki, Qarabağda humanitar vəziyyətin tədricən yaxşılaşdırılması Bakı ilə Xankəndi arasında dialoqun başlanmasına və liderlər arasında 2020-2022-ci illərdə ən yüksək səviyyədə üçtərəfli sazişlərin bütün kompleksinin həyata keçirilməsi üzrə ritmik işin bərpasına şərait yaradacaq"-deyə o bildirib.