Türkiyə XİN Qarabağda başlayan antiterror əməliyyatları ilə bağlı bəyanat yayıb

"Azərbaycanın Qarabağ bölgəsində qeyri-qanuni erməni silahlı ünsürlərinin Azərbaycan ordusunun üzvlərinə və təhlükəsizlik qüvvələrinə qarşı uzun müddətdir davam edən silahlı basqınlarına və təxribatlarına qarşı bu gün (19 sentyabr) Azərbaycan ordusu tərəfindən silahlı ünsürləri hədəf alan antiterror əməliyyatı keçirilib".

"Operativ Media" xəbər verir ki, bu fikirlər Türkiyə Xarici İşlər Nazirliyinin Qarabağda başlayan antiterror əməliyyatları ilə bağlı yaydığı bəyanatında yer alıb. 

"İkinci Qarabağ müharibəsinin başa çatmasından keçən üç ilə yaxın müddətdə yerlərdəki vəziyyətlə bağlı daim bəyan etdiyi haqlı narahatlığın həllini tapmaması nəticəsində Azərbaycan öz suveren ərazisində zəruri hesab etdiyi tədbirləri görməli oldu.

Hesab edirik ki, Azərbaycan və Ermənistan arasında indiyədək ciddi şəkildə həyata keçirilən hərtərəfli danışıqlar prosesinin nəticəyönümlü şəkildə davam etdirilməsinin təmin edilməsi regionda sülhün, təhlükəsizliyin, firavanlığın və daimi sabitliyin bərqərar olmasının yeganə yoludur", - bəyanatda qeyd olunub.