BMT-nin Qarabağdakı bir günlük missiyası son on il ərzində ilk dəfə Qarabağa səfər edib. Moskva missiyanın fəaliyyətinin nəticələrini təhlil etmək niyyətindədir və hesabat gözləyir.
"Operativ Media" xəbər verir ki, bunu Rusiya xarici işlər nazirinin müavini Sergey Verşinin brifinqdə deyib.
"Bildiyimiz qədərilə, söhbət BMT-nin bir günlük missiyasından gedir və biz hazırda hesabat gözləyirik", - deyən nazir müavini BMT-nin bu cür missiyasının son il ərzində əraziyə ilk dəfə getdiyini əlavə edib.
"BMT-nin bir günlük missiyası mahiyyətcə hazırki vəziyyətdə mümkün olanı etdi, bu isə sakinlər arasında sorğu keçirərək baş verənlərin infrastruktura nə dərəcədə təsir göstərdiyini müəyyən etməkdən ibarətdir. Hələ ki məlum olanlar ciddi dağıntıların olmadığını, dini məbədlərin və s. zərər görmədiyindən xəbər verir", - o deyib.
Xatırladaq ki, üçtərəfli bəyanatın müddəalarının təmin olunması, Qarabağ iqtisadi rayonunda törədilən genişmiqyaslı təxribatların qarşısının alınması, Ermənistan silahlı qüvvələrinin birləşmələrinin tərksilah edilərək ərazilərimizdən çıxarılması, onların hərbi infrastrukturunun zərərsizləşdirilməsi, işğaldan azad edilmiş ərazilərə qayıdan dinc əhali, habelə bərpa-quruculuq işlərinə cəlb olunmuş mülki işçilər və hərbi qulluqçularımızın təhlükəsizliyinin təmin olunması və Azərbaycan Respublikasının konstitusiya quruluşunun bərpa edilməsi məqsədilə 19-20 sentyabr tarixlərində bölgədə lokal xarakterli antiterror tədbirləri keçirilib.
Tədbirlər çərçivəsində Ermənistan silahlı qüvvələrinin birləşmələrinin ön xətt və dərinlikdə olan mövqeləri və uzunmüddətli atəş nöqtələri, eləcə də döyüş vasitələri və hərbi təyinatlı obyektləri yüksək dəqiqlikli silahların tətbiqi ilə sıradan çıxarılıb. Bir daha bildiririk ki, mülki əhali və infrastruktur obyektləri hədəfə alınmır, yalnız legitim hərbi hədəflər sıradan çıxarılıb.
Qarabağın erməni sakinlərinin nümayəndələrinin Rusiya sülhməramlı kontingenti vasitəsilə müraciətini nəzərə alaraq 2023-cü il sentyabrın 20-də saat 13:00-da aşağıdakı şərtlər altında lokal xarakterli antiterror tədbirlərinin dayandırılması barədə razılıq əldə olunub:
Azərbaycan Respublikasının Qarabağ bölgəsində yerləşən Ermənistan silahlı qüvvələrinin birləşmələri, qeyri-qanuni erməni silahlı dəstələri silahı yerə qoyur, döyüş mövqelərindən və hərbi postlardan çıxır və tam şəkildə tərksilah olunurlar. Ermənistan silahlı qüvvələrinin birləşmələri Azərbaycan ərazilərini tərk edir, qeyri-qanuni erməni silahlı dəstələri buraxılır; paralel şəkildə bütün silah-sursat və ağır texnika təhvil verilir; yuxarıda qeyd olunan proseslərin Rusiya sülhməramlı kontingenti ilə əlaqələndirilmiş şəkildə həyata keçirilməsi təmin edilir.
