İlham Əliyev: Ermənistan da razı olarsa, Gürcüstanda həm ikitərəfli, həm üçtərəfli görüşə hazırıq

“Bəzi ölkələr və bəzi beynəlxalq təşkilatlar Ermənistan və Azərbaycan arasında gedən normallaşma prosesində öz dəstəyini göstərməyə çalışırlar. Biz bunu alqışlayırıq”.

"Operativ Media" xəbər verir ki, bunu Azərbaycan Respublikasının Prezidenti İlham Əliyev Gürcüstanın Baş naziri İrakli Qaribaşvili ilə təkbətək görüşdən sonra mətbuata bəyanatda deyib.

“Əgər bu birtərəfli və qərəzli deyilsə, əlbəttə ki, istənilən vasitəçiliyi və yardımı biz qəbul edirik. Ancaq mənim fikrimcə, ən düzgün seçim və həm tarixi əlaqələri, həm coğrafi faktoru nəzərə alaraq, əlbəttə ki, bu sahədə Gürcüstan ola bilərdi. Və mən cənab Baş nazirə minnətdaram ki, o da bu sahədə mümkün olan vasitəçilik imkanlarını ortaya qoyur. Hesab edirəm ki, biz buna hazır olan ölkə kimi Ermənistandan da eyni yanaşmanı gözləməliyik. Əgər Ermənistan tərəfdən də razılıq olarsa, bizim aidiyyəti qurumların rəhbərləri Gürcüstanda həm ikitərəfli, həm də üçtərəfli görüşə gələ bilərlər”, - deyə dövlət başçısı əlavə edib.