Braziliyanın Minas Gerais Federal Universitetinin alimləri narkotik aludəçiləri üçün kokaindən və onun güclü törəməsi olan krekindən istifadə etdikdən sonra xoş hisslərin yaranmasının qarşısını alan dərman hazırlayıblar.

"Operativ Media" xəbər verir ki, bu barədə "Daily Mail" məlumat yayıb.

"Calixcoca" adlı dərman əvvəl siçanlar üzərində sınaqdan keçirilib. Peyvənd bədənin immun reaksiyasını işə salmaqla dərmanların insan beyninə təsirini bloklayır və eyforiya, halüsinasiyalar, yuxululuq (və ya əsəb həyəcanı) yaranmasının qarşısını alır.

Peyvənd immun sistemini qandakı dərman molekullarına bağlanan antikorlar istehsal etməyə təşviq edir. Bu, molekulların beynin mükafat sistemi kimi tanınan mezolimbik yoluna daxil ola bilməyəcək qədər böyüməsinə səbəb olur.

İndi alimlər peyvəndin optimal dozasının nə qədər olduğunu öyrənməyə çalışırlar. Bundan sonra dərman insanlarda sınaqdan keçirilə bilər. Alimlər üç mindən çox insanın bu klinik sınaq üçün könüllü olmağa əlaqə saxladığını bildiriblər.