Bayden Yaponiyanın baş nazirini ABŞ-a dəvət edib
ABŞ prezidenti Cozef Bayden Yaponiyanın baş naziri Fumio Kişidanı ölkəsinə rəsmi səfərə dəvət edib.
"Operativ Media" Kyodo xəbər agentliyinə istinadən xəbər verir ki, bunu Yaponiyanın baş naziri Fumio Kişida San-Fransiskoda jurnalistlərə bildirib.
Agentliyin məlumatına görə, Kişida bu barədə ABŞ prezidenti ilə ikitərəfli sammitdən sonra məlumat verib.
Yaponiya Xarici İşlər Nazirliyinin məlumatına görə, APEC sammiti çərçivəsində 15 dəqiqə davam edən görüşdə tərəflər qlobal və regional gündəliyi, eləcə də Çinlə bağlı qarşılıqlı əlaqələri müzakirə ediblər .
Yaponiya Xarici İşlər Nazirliyinin yaydığı sənəddə deyilir: “ABŞ və Çin arasında keçirilən sammitin yekunlarına əsasən, liderlər Çin ətrafında olan məsələlərlə bağlı sıx əməkdaşlığı davam etdirmək barədə razılığa gəliblər, həmçinin ümumi problemlərin həlli üçün Çin ilə əməkdaşlığın vacibliyini bir daha təsdiqləyiblər”. .
Tərəflər həmçinin Yaxın Şərqdəki vəziyyəti müzakirə ediblər .
Baş nazir Kişida bildirib ki, o, prezident Baydenin rəhbərliyini və ABŞ-ın diplomatik səylərini, o cümlədən İsrail və Fələstindəki vəziyyətlə bağlı humanitar fasilələrin həyata keçirilməsini yüksək qiymətləndirir . Liderlər HƏMAS-ın terror hücumlarını pisləyib və humanitar yardımın yaxşılaşdırılması üçün birgə işi davam etdirməyə razılaşıblar.
Yaponiya Xarici İşlər Nazirliyinin məlumatına görə, tərəflər həmçinin Rusiyaya qarşı sərt sanksiyaları davam etdirmək və Ukraynaya qəti dəstək barədə razılığa gəliblər.
