Dekabrın 14-də Türkmənbaşı şəhərində Azərbaycan Respublikasının Prezidenti İlham Əliyevin Türkmənistan Prezidenti Sərdar Berdiməhəmmədov ilə görüşü olub.
Sərdar Berdiməhəmmədov dövlətimizin başçısı ilə görüşündən dərin məmnunluq hissi keçirdiyini bildirərək, dəvəti qəbul etdiyinə və Azərbaycan, Türkiyə və Türkmənistan Dövlət Başçılarının Birinci Üçtərəfli Zirvə Görüşündə iştirakına görə Prezident İlham Əliyevə minnətdarlığını ifadə etdi. Hazırkı dövrdə üçtərəfli əməkdaşlığın xüsusi əhəmiyyət daşıdığını deyən Sərdar Berdiməhəmmədov Türkmənistan tərəfinin bu Zirvə Görüşünə böyük önəm verdiyini vurğuladı.
Prezident İlham Əliyev qardaş Türkmənistana yenidən səfərindən məmnunluğunu ifadə etdi, bu Zirvə Görüşünün keçirilməsi təşəbbüsünə görə Prezident Sərdar Berdiməhəmmədova minnətdarlığını bildirdi. Üç xalqın tarix və dil baxımından ümumi köklərə malik olduğunu deyən dövlətimizin başçısı əməkdaşlığımızın genişləndirilməsi üçün yaxşı imkanların mövcudluğunu vurğuladı. Prezident İlham Əliyev bu Zirvə Görüşünün regional əməkdaşlığa, nəqliyyat, logistika, ticarət sahələrində əlaqələrin genişlənməsinə töhfə verəcəyinə əminliyini ifadə etdi. Eyni zamanda, bu görüşün ikitərəfli əlaqələrin müzakirəsi üçün də yaxşı imkan yaratdığını bildirdi.
Görüşdə əməkdaşlığın perspektivləri barədə fikir mübadiləsi aparıldı.
***
Azərbaycan Respublikasının Prezidenti İlham Əliyev və Türkmənistan Respublikasının Prezidenti Sərdar Berdiməhəmmədov arasında Avazada görüş keçirilib.
"Operativ Media" Türkmənistan mətbuatına istinadən xəbər verir ki, görüş zamanı Türkmənistan-Azərbaycan əməkdaşlığı məsələlərini müzakirə edən həmsöhbətlər çoxəsrlik mehriban qonşuluq münasibətlərinin möhkəmləndirilməsində və özünün yeni mərhələsinə qədəm qoymuş qarşılıqlı faydalı əməkdaşlığın daha da mütərəqqi inkişafında tərəflərin qarşılıqlı maraqlı olduğunu vurğulayıblar.
Danışıqlar zamanı hər iki ölkənin ikitərəfli münasibətləri fəal şəkildə inkişaf etdirdiyi və beynəlxalq aləmdə, iri beynəlxalq təşkilatların və nüfuzlu regional strukturların platformasında səmərəli qarşılıqlı fəaliyyət göstərdiyi vurğulanıb.
Görüşdə hər iki dövlətin başçıları əvvəllər əldə edilmiş razılaşmaların həyata keçirilməsini müzakirə ediblər. Nəhəng karbohidrogen ehtiyatlarına malik qonşu dövlətlərin əlverişli coğrafi mövqeyi nəzərə alınmaqla enerji təhlükəsizliyinin təmin edilməsi, o cümlədən müasir tranzit və nəqliyyat infrastrukturunun yaradılması sahəsində əməkdaşlığın genişləndirilməsi perspektivləri ayrıca müzakirə mövzusu olub.
Bununla yanaşı, təhsil, elm, mədəniyyət, səhiyyə və digər sosial əhəmiyyətli sahələrdə əlaqələrin daha da genişləndirilməsi və möhkəmləndirilməsinin vacibliyi vurğulanıb.
