“5 apreldə Brüsseldə baş tutacaq üçtərəfli görüş Ermənistanı çətin vəziyətə sala bilər. Avropa İttifaqı (Aİ), ABŞ və Ermənistan arasında baş tutacaq görüşdə rəsmi İrəvana bir sıra vədlərin veriləcəyi ehtimal edilir”.
Bunu “Operativ Media”ya açıqlamasında millət vəkili Rasim Musabəyov deyib.
Millət vəkilinin sözlərinə görə, Ermənistan faktiki olaraq meylini Rusiyaya deyil, Avropaya yönəldib. Rusiyanın qəzəbindən çəkinən Ermənistana Qərbdən bir sıra vədlər veriləcək:
“Başqa bir sözlə, Qərb Ermənistanı müxtəlif hərbi-siyası təhlükələrdən qorumağa çalışır. Görüşdə, əslində, heç bir hüquqi öhdəlik yaratmayan bəyanat səslənəcəyi gözlənilir. Həmin bəyanatda Ermənistanın Avropa seçimi dəstəklənəcək. Həmin vədlərin reallaşıb-reallaşmayacağı sual doğurur. Həmçinin, Fransa çalışır ki, sərhəddə yerləşdirilən Avropa missiyasının maliyyələşməsini Avropa Sülh Fondunun hesabına etsin. Məqsəd budur ki, Avropa Birliyi və ABŞ, Rusiyanın Ermənistanı qaz, neft məhsulları və qida məhsulları ilə cəzalandırdığı halda Ermənistana dəstək versinlər. Guya ki indi olacaqmı? Hansı şəkildə Moskva erməniləri cəzalandırmaq istəyəcək, bu ikinci məsələdir. Hər halda bu məsələni özləri müzakirəyə atıblar. Burada çox vədlər səslənə bilər, düşünmürəm ki, öhdəlik olsun''
Millət vəkili bildirib ki, əgər Ermənistan bu görüşdən sonra hər hansı bir səhv addım atsa, cəzası da gecikməyəcək:
''İnanmıram ki, Ermənistan bundan ürəklənərək Azərbaycanın üzərinə yeriməyə cəsarət tapsın. Eləsələr, buyursunlar. Çoxdan gözləyirdik ki, bunlar bir səhv etsinlər, ancaq etməzlər. Mən heç düşünmürəm ki, Azərbaycanın adı hansısa bir şəkildə səsləndirilsin. Çünki buna onların əsasları yoxdur. Əgər belə bir fikir səslənərsə, bunu Azərbaycana qarşı açıq düşmən mövqe kimi qəbul edəcəyik. Bunu həm Vaşinqtona, həm də Brüsselə çatdırmışıq. Bütün hallarda bu, Ermənistanı Ukraynaya çevirmək cəhdidir. Yenə də vədlər veriləcək və həmin vədlər yerinə yetirilməyəcək. Məğlub olan Ermənistan daha biabırçı duruma düşəcək''.
