Türkiyə XİN: Ermənistan, Aİ və ABŞ arasındakı görüş geosiyasi vəziyyəti pisləşdirəcək

2024-cü il aprelin 5-də Brüsseldə keçiriləcək Ermənistan, Avropa İttifaqı (Aİ) və ABŞ arasında üçtərəfli görüş regiondakı mürəkkəb problemlərin həlli üçün əsas sayılan neytrallıq yanaşmasına zərbə vuracaq.

"Operativ Media" xəbər verir ki, bu barədə Türkiyə Xarici İşlər Nazirliyi bəyanat yayıb.

Qeyd olunub ki, Azərbaycanın iştirakı olmadan baş tutacaq bu görüş Cənubi Qafqazda sülhə xidmət etmək yerinə bölgənin münaqişələr meydanına çevrilməsinə yol açacaq.

"Türkiyə həmişə olduğu kimi bu məsələdə üzərinə düşəni etməyə davam edəcək və Azərbaycanla Ermənistan arasında daimi sülhün əldə olunması üçün tarixi fürsətdən istifadəni təşviq etməyə davam edəcək", - deyə bəyanatda vurğulanıb.

Həmçinin əlavə olunub ki, Azərbaycanın İkinci Qarabağ müharibəsində zəfəri ilə işğal olunmuş torpaqların azad edilməsi və 19-20 sentyabr 2023-cü il tarixlərində Qarabağda həyata keçirilən antiterror əməliyyatı ilə bütün ölkə üzərində suverenliyinin bərpası nəticəsində regionda daimi sülh və sabitliyin bərqərar olması üçün tarixi fürsət yaranıb.