Paşinyan Ermənistanın infrastrukturunun modernləşdirilməsində Qərbdən kömək ümid edir

Ermənistan hökuməti Qərbin respublikanın infrastrukturunun modernləşdirilməsində kömək edəcəyinə ümid edir.

"Operativ Media" xəbər verir ki, bunu Ermənistanın Baş naziri Nikol Paşinyan ABŞ dövlət katibi Antoni Blinken, Avropa diplomatiyasının rəhbəri Cozep Borrel və Avropa Komissiyasının sədri Ursula fon der Leyenlə birgə brifinqdə çıxışı zamanı deyib.

O, ölkəsinin Aİ və ABŞ şirkətlərini cəlb etmək üçün investisiya mühitini yaxşılaşdırmağa hazır olduğunu vurğulayıb.

"Biz yeni bazarlara çıxmaq üçün Ermənistanın özəl sektorunun rəqabət qabiliyyətini artırmaqda qərarlıyıq. Biz həmçinin investisiya mühitimizi yaxşılaşdırmağa və onu Avropa və Amerika şirkətləri üçün daha cəlbedici etməyə hazırıq", - deyə Paşinyan bildirib.

Bundan əlavə, baş nazir Ermənistanın İrəvanla Bakı arasında münasibətlərin tənzimlənməsi prosesinə sadiqliyini bir daha bəyan edib.

Paşinyan onu da qeyd edib ki, bu, dövlətlərin suverenliyi və ərazi bütövlüyünün qarşılıqlı tanınmasına əsaslanmalıdır.

Mətbuat konfransında Blinken bildirib ki, ABŞ Ermənistana 65 milyon dollardan çox yardım etməyi planlaşdırır. Onun sözlərinə görə, bu vəsaitlər ilk növbədə respublikanın dövlət idarəçiliyi və iqtisadiyyatı sahələrinə yatırılacaq.