"Baxmayaraq ki, Fransanın bizə qarşı xüsusilə son 3 ildəki münasibəti təxribatçı platformaya əsaslanır, hətta bəzi hallarda açıq düşmənçilik xarakteri daşıyır. Bizim dünyada olduqca müsbət siyasi imicimiz, iqtisadi çəkimiz var. Biz bu hörməti özümüz, öz davranışımızla, əməllərimizlə, tərəfdaşlarımızla hörmətə əsaslanan münasibətimizlə qazanmışıq. Fransa bu sırada olmaq istəmirsə, yaxud bu sırada deyilsə, səbəbini özündə, öz siyasətində axtarmalıdır".
Bunu millət vəkili Elnur Allahverdiyev "Operativ Media"ya açıqlamasında deyib.
O bildirib ki, Azərbaycan bütün dünya dövlətləri ilə, o cümlədən Fransa ilə qarşılıqlı hörmətə, beynəlxalq hüquq və normalara əsaslanan münasibətlərin qüvvədə olmasında maraqlıdır. Dövlətimiz öz siyasəti, davranışı ilə bunu dəfələrlə sübut edib:
"Son 3 ilə nəzər yetirsək, rəsmi Parisin Azərbaycanla münasibətləri gərginləşdirmək üçün bütün mümkün olan addımları atdığının şahidi olmuşuq. Minsk qrupu çərçivəsindəki tərəfsiz statusunu tapdayıb Ermənistana açıq dəstək göstərməklə, sülh müqaviləsinin imzalanmasının qarşısını almaqla, İrəvanı silahlandırmaqla, BMT-də, Avropa Birliyində Azərbaycana qarşı düşmənçilik kampaniyasını aparmaqla. Bütün bunları Fransa bizə qarşı edib, biz Fransaya qarşı deyil. Bu baxımdan, Parisin öz səfirini geri çağırması Fransanın prezidenti və diplomatik korpusunun problemidir, özləri çözməyə çalışsınlar. Hər halda bu addımla onlar vəziyyətə heç bir real təsir edə bilməzlər. Üstəlik, bu hərəkətlə öz zəifliklərini göstərirlər, Azərbaycanın arqumentləri qarşısında əlacsız olduqlarını etiraf edirlər".
Siyasətçi qeyd edib ki, Fransanın özündə Azərbaycana qarşı neqativ kampaniya aparılır:
"Düşünürəm ki, dövlətimiz Prezident cənab İlham Əliyevin rəhbərliyi ilə indiyədək nümayiş etdirdiyimiz düşünülmüş xarici siyasətinin məntiqinə uyğun olaraq ən optimal addımı atacaq. Bizə qarşı Fransanın özündə neqativ kampaniya aparılır, ərazimizdə fəaliyyətdə olmuş separatçı cinayətkar qurum yerli parlamentdə tanınır. Buna rəğmən biz tolerantlıq nümayiş etdiririk. Ancaq nəticədə “küsüb” gedən Fransa səfiri olur. Gün gələcək getdiyi kimi də qayıdacaq. Bizim bu kimi məsələlərə sərf etməyə vaxtımız yoxdur".
Sevinc İbrahimzadə