Peskov: İrəvan Bakının sərhədlərini tanıyıb, Qarabağdakı rus sülhməramlılarının işi yoxdur

"Rusiya sülhməramlıları Qarabağı tərk etdilər, çünki onlar üçün regionda artıq heç bir funksiya qalmamışdı". 

"Operativ Media" xəbər verir ki, bunu Birinci Kanalda Rusiya prezidentinin mətbuat katibi Dmitri Peskov deyib. 

Onun sözlərinə görə, mövcud vəziyyət Ermənistanın Azərbaycan sərhədlərini tanımasından sonra mümkün olub.

"Sülhməramlıların geri çəkilməsi Ermənistanın 1991-ci ildə Azərbaycanın sərhədlərini tanımasından sonra regionda yaranmış hazırkı reallıqlara uyğundur", - deyə Kreml nümayəndəsi izah edib. 

"Orada geosiyasi reallıqlar dəyişib və sülhməramlı qüvvələr üçün artıq funksiya qalmayıb", - Peskov əlavə edib.