"Azərbaycan və Ermənistan arasında ilk sərhəd dirəyinin quraşdırılması yeni bir mərhələdir" - Politoloq

"Azərbaycan və Ermənistan arasındakı sülhün reallaşması baxımından ilk sərhəd dirəyinin quraşdırılması vacib əhəmiyyətə malikdir". 

Bunu "Operativ Media"ya açıqlamasında politoloq Tural İsmayılov deyib.

Politoloq bildirib ki, Qazaxın 4 kəndinin qaytarılması ilə, artıq Azərbaycan və Ermənistan arasında ilk dəfə delimitasiya olunmuş dövlət sərhədi olacaq. Bu isə çox vacib əhəmiyyətə malikdir. 

"Həm də 30 il ərzində Ermənistanın işğalçılıq siyasəti ilə üz-üzə qalan bir dövlət olmuşuq və indi əlbəttə ki, belə bir faktorla üz-üzə qalırıq ki, Azərbaycan regionda yeni reallıqlar yaradır və yeni reallıqları yaradan qalib tərəf kimi şərtləri diqtə edən tərəfi. Buna görə, artıq Ermənistan da Azərbaycanın yaratdığı bu reallıqları qəbul etmək məcburiyyətində qalır. İki ölkə arasında sərhəd dirəyinin quraşdırılması birmənalı şəkildə tarixi hadisədir və hesab edirəm ki, həm də delimitasiya ilə bağlı sürətli işlərə start verilməsi Azərbaycanın təşviq etdiyi regional sülh üçün vacib olan konturların Ermənistan və havadarlarının bütün təxribatlarına rəğmən Ermənistan tərəfindən qəbul edilməli olduğunu, bunun üçün addımlar atılmağa çalışıldığını görürük. Təbii ki, bu da Azərbaycan və Ermənistan arasındakı münasibətləri növbəti bir mərhələyə daşımış olur və iki ölkə arasında gələcəkdə də vəziyyətin və əlaqələrin daha da inkişaf etməyinə səbəb olur. Bu baxımdan mən hesab edirəm ki, Azərbaycan və Ermənistan arasındakı sülhün reallaşması baxımından da ilk sərhəd dirəyinin quraşdırılması vacib əhəmiyyətə malikdir", - politoloq qeyd edib.