“Halal” sertifikatlaşdırma ilə bağlı Azərbaycan Qida Təhlükəsizliyi İnstitutuna (AQTİ) üç müəssisədən rəsmi müraciət daxil olub. Müraciətlərin daxil olmasının asanlaşdırılması istiqamətində işlər görülməkdədir.
"Operativ Media" xəbər verir ki, bunu AZƏRTAC-a açıqlamasında AQTİ-nin Sertifikasiya şöbəsinin müdiri Vüsal Əmirxanov bildirib.
“Halal” sertifikatlaşdırmada qiymət siyasətinin necə müəyyənləşdiriləcəyi məsələsinə münasibət bildirən AQTİ rəsmisi deyib:
“Azərbaycan Qida Təhlükəsizliyi İnstitutunda “Halal” sertifikatlaşdırma prosesi iki mərhələdə həyata keçirilir. Əvvəlcə qiymətləndiriləcək müəssisədən ilkin olaraq fəaliyyətləri təsvir edəcək sənədlər toplusu tələb edilir və təqdim edilən sənədlərin müəssisədə OIC/SMIIC-1 “Halal Qida üzrə tələblər” standartının tələblərinin yerinə yetirilmə səviyyəsi təhlil olunur. Daha sonra sənədlərin uyğunluğuna qərar verildiyi halda, uyğunluq qiymətləndirməsinin həyata keçirilməsi üçün sahibkarlıq subyektinə xidmət müqaviləsi ünvanlanır. Xidmət müqaviləsi hər iki tərəfdən təsdiq edildikdən sonra xidmətin həyata keçirilməsi üçün zəruri xidmət haqqının ödənilməsi həyata keçirilməlidir.
“Halal” sertifikatlaşdırma üçün xidmət haqlarının müvafiq beynəlxalq standartların tələblərinə uyğun olaraq sertifikatlaşma prosesinə sərf olunan müddətlə - adam/gün tarifi ilə tənzimləndiyini bildirən V.Əmirxanov qeyd edib ki, bu tarif və tarifin tənzimlənməsi üzrə xüsusi təlimat sənədləri hazırlanıb və qısa müddət ərzində yeni yaradılacaq platformada cəmiyyətə açıq informasiya kimi paylaşılacaq. “Halal” sertifikatlaşdırma ödənişli xidmət növüdür və sənədlərin təhlilindən sertifikatın verilməsinə qədər olan bütün mərhələlər müəyyən mütəxəssis əməyi tələb edir. Bu səbəbdən də sahibkarların sertifikatlaşma ilə bağlı müraciətlərinə mənfi qərar verilməsi belə, müəyyən xidmətin həyata keçirilməsi hesab edilir”.
