“Ermənistan Konstitutsiyasının dəyişdirilməsi vacibliyi barədə Baş nazir Nikol Paşinyanın mövqeyi bəllidir, o da hesab edir ki, əsas qanunda qonşu dövlətlərə ərazi iddialarını əks etdirən bəndlər olmamalıdır. Ancaq hələ ki, bununla bağlı heç bir müsbət addım atılmır”.
Bunu “Operativ Media”ya açıqlamasında siyasi şərhçi Asif Nərimanlı deyib.
Asif Nərimanlının sözlərinə görə, Ermənistan konstitutsiyasında nəinki, Azərbaycana, hətta Türkiyəyə qarşı da ərazi iddiaları var. Bu səbəbdən rəsmi İrəvan Konstitutsiyasına dəyişiklik etməlidir:
"Konstitutsiyada qeyd olunur ki, müstəqillik bəyannaməsinin bəndləri icra edilməlidir. Müstəqillik bəyannaməsində isə Qarabağın Ermənistana birləşdirilməsi məsələsi yer alıb. Yəni qondarma Miyatsum məsələsi hələ də onlar üçün gündəmdədir. Bu dövlətin əsas məsələlərindən biri kimi qeyd olunub. Bu açıq şəkildə Azərbaycana qarşı ərazi iddialarının olması deməkdir. Konstitutsiya dəyişdirilməsə, sülh sazişinin imzalanması sual altına düşəcək və yaxud da imzalansa belə davamlı ola biləcəyi də sual altındadır".
Siyasi şərhçi deyir ki, əgər gələcəkdə Ermənistanda hakimiyyət dəyişərsə, onlar sülh sazişindən imtina edib konstitutsiyaya istinad edə bilərlər:
“İkinci və digər sülhə əngəl olan məsələ isə ATƏT-in Minsk qrupunun fəaliyyəti, daha doğru fəaliyyətsizliyi ilə bağlıdır ki, bu məsələdə də dövlət başçısının mövqeyi bəllidir. Prezident Nikol Paşinyana iki dövlətin Minsk Qrupunun ləğvi ilə bağlı ATƏT-ə birgə müraciətini təklif edib. Ancaq Paşinyanın bununla bağlı mövqeyi bəlli deyil. Azərbaycan isə heç bir halda Minsk Qrupunun fəaliyyət göstərməsinə de-fakto imkan verməyəcək. Ermənistanın arxaikləşmiş heç bir funksiya daşımayan Minsk qrupunun saxlanmasına üstünlük verməsini qonşu dövlətin Azərbaycana qarşı ərazi iddialarının davamı kimi qiymətləndirilir. Bir sözlə, Ermənistan Konstitusiyasına dəyişikliklərin edilməsi və Minsk qrupunun ləğv edilməsinə razılıq verilməsi hərtərəfli sülh sazişinin bağlanması, delimitasiya və demarkasiya işlərinin aparılması istiqamətində ciddi bir irəliləyiş olacaq. Ermənistan xalqı Azərbaycan və Türkiyə ilə normal qonşuluq münasibətlərinin qurulmasını istəyirsə, o zaman Azərbaycanın və Türkiyənin tələbi ilə yeni qanunvericilik aktlarının qəbulunu da həyata keçirməyə hazır olmalıdır. İndilikdə isə blokada vəziyyətində olan, bütün regional layihələrdən kənarda qalan Ermənistanın ərazi iddiaları, xəstə xülyaları onu dünyadan daha da təcrid vəziyyətinə salır”.
