"Görüşdə Suriya və bölgədəki vəziyyətin ən qısa zamanda yaxşılaşdırılması, sülh, əmin-amanlıq və sabitliyin təmin edilməsi üçün nələr edilə biləcəyini müzakirə etdik".
"Operativ Media" xəbər verir ki, bunu Türkiyə Milli Müdafiə naziri Hulusi Akar dünən Moskvada keçirilən Türkiyə, Rusiya və Suriya müdafiə nazirlərinin görüşü ilə bağlı mətbuata açıqlamasında bildirib.
Türkiyənin fikir və qiymətləndirmələrini çatdırdıqlarını, digər tərəflərin də qiymətləndirmələrini dinlədiklərini bildirən nazir Akar qeyd edib ki:
“Görüşdə qaldırdığımız ən mühüm məsələlərdən biri terrorizmlə mübarizə idi. Başda Suriya və İraq olmaqla bütün qonşularımızın ərazi bütövlüyü və suverenlik hüquqlarına hörmət etdiyimizi, yeganə məqsədimizin terrorla mübarizə olduğunu, başqa məqsədimiz olmadığını vurğuladıq. Suriyaya da təhlükə yaradan PKK/YPG, DAİŞ kimi terror təşkilatlarının üzvlərini zərərsizləşdirməyi hədəflədiyimizi bildirdik. Ölkəmizin, millətimizin, sərhədlərimizin təhlükəsizliyini təmin etmək üçün səy göstərdiyimizi söylədik. Bu araşdırmalar çərçivəsində Suriyadan Türkiyəyə daha çox köçün qarşısını almaq üçün səy göstərdiyimizi də bildirdik. Suriya probleminin BMT Təhlükəsizlik Şurasının 2254 saylı qətnaməsi çərçivəsində əhatəli və vahid şəkildə həll edilməsinin vacibliyini vurğuladıq. Bu mənada qarşıdakı günlərdə həyata keçiriləcək işlərin bölgədə və Suriyada sülh və sabitliyə ciddi töhfələr verəcəyini düşünürük” - deyə nazir bildirib.
Üçtərəfli görüşlərin davam etdirilməsi mövzusunda razılaşdıqlarını açıqlayan nazir Akar, “Arzumuz bölgəyə sülh, əmin-amanlıq və sabitliyin ən qısa zamanda gəlməsidir. Bunun üçün indiyə qədər etdiyimiz kimi bundan sonra da üzərinə düşən vəzifələri yerinə yetirəcək, lazımi töhfələri verəcəyik” -deyə, qeyd edib.
