Mədəniyyət naziri Adil Kərimli Azərbaycan-Mərakeş münasibətlərindən danışıb

"2007-ci il münasibətlərin inkişafında mühüm rol oynayıb".

"Operativ Media" xəbər verir ki, bunu mədəniyyət naziri Adil Kərimli Mərakeş kralının taxta çıxmasının 25-ci ildönümü münasibətilə keçirilən tədbirdə deyib.

O əlavə edib ki, sonradan əlaqələrimiz Azərbaycan Prezidenti İlham Əliyev və Mərakeş kralı II Həsən tərəfindən müvəffəqiyyətlə inkişaf etdirilərək, qardaşlıq səviyyəsinə çıxarılıb:

"Azərbaycan və Mərakeş arasında dostluq və tərəfdaşlıq əlaqələrinin əsası 1991-ci ildə qoyulub. Həmin dövrdə Mərakeş Azərbaycanın müstəqilliyini tanıyıb. Bundan sonra 1992-ci ildə dövlətlərimiz arasında diplomatik münasibətlər başlayıb. 1994-cü ildə Azərbaycanın Ümummilli lideri Heydər Əliyev Mərakeş Kralığına səfər edərək, Kral II Həsən ilə görüşüb. Bu zaman isə əlaqələrimiz qardaşlıq səviyyəsinə qədəm qoyub. Bu münasibətlərimiz Azərbaycan Prezidenti İlham Əliyev və Əlahəzrət Kral VI Məhəmməd tərəfindən davam etdirilərək tamamilə yeni mərhələyə çıxarılıb. Bu gün iki ölkə arasında münasibətlər həm ikitərəfli formatda, həm də beynəlxalq təşkilatlar çərçivəsində uğurla davam etməkdədir. 2007-ci il münasibətlərin inkişafında mühüm rol oynayıb. 2023-ci ildə Birgə Komissiyanın iclası Rabat şəhərində keçirilib. Burada ölkələrimizin iqtisadiyyat, mədəniyyət, təhsil, kənd təsərrüfatı, turizm və digər sahələrdə əməkdaşlıq imkanları geniş şəkildə müzakirə olunub".