Bir milyondan artıq insan üçün Vətən müharibəsi həm də haqqın, ədalətin bərpası demək idi - ŞƏRH

“Vətən müharibəsi yalnız beynəlxalq hüququn aliliyinin təmin edilməsi yox, həm də insan haqları adına böyük tarixi, siyasi və hüquqi hadisədir”.

"Operativ Media" xəbər verir ki, bu sözləri Milli Məclisin deputatı, hüquq üzrə fəlsəfə doktoru Bəhruz Məhərrəmov deyib.

Bəhruz Məhərrəmov qeyd edib ki, Vətən müharibəsi haqqın, ədalətin bərpasıdır:

30 ildən artıq davam etmiş işğal və təcavüz siyasəti, habelə keçmiş işğal zonasında Ermənistanın törətdiyi çoxsaylı hərbi cinayətlər, ələlxüsus ekosid, urbisid və kultrasid özlüyündə digər ümumbəşəri niyyətlərlə yanaşı, insan haqları qarşısında ən böyük təhdid kimi çıxış etməkdə idi. Cənab İlham Əliyevin Müzəffər Ali Baş Komandanlığı altında Azərbaycan Ordusunun işğala, təcavüzə və davam edən çoxsaylı cinayətlərə son qoyması ilk növbədə həm də insan haqlarının təntənəsi kimi çıxış etməyə başladı.

30 ildən artıq davam etmiş münaqişə nəticəsində mülkiyyət hüquqları başda olmaqla, çoxsaylı haqlarından məhrum edilmiş bir milyondan artıq insan üçün Vətən müharibəsi həm də haqqın, ədalətin bərpası demək idi.

Ötən əsrin 80-ci illərinin sonu və 90-cı illərinin əvvələrində zorakılıqla öz evlərindən didərgin salınan, insan ləyaqəti ilə bir araya sığmayan amansız rəftara məruz qalan Qarabağ və Zəngəzur sakinləri məhz Vətən müharibəsində Azərbaycanın qələbəsi ilə ədalətin təntənəsinə inanmağa başladılar.

Bu gün artıq keçmiş işğal bölgəsinə cənab İlham Əliyevin qətiyyəti ilə həyatın qayıtması, mina ilə çirklənmiş o zonalarda təhlükəsiz yaşayışın tədricən təmin edilməsi insan haqları adına bir Azərbaycan nümunəsidir və hələ də vətəndaşları münaqişələrdən, separatizmdən əziyyət çəkən dövlət və xalqlar üçün ümid işığına çevrilməkdədir".