Səhiyyə Nazirliyi: Mövsümi qrip və digər kəskin respirator infeksiyalara yoluxma hallarında artımlar müşahidə edilir

"Payız və qış aylarında ənənəvi olaraq mövsümi qrip və digər kəskin respirator infeksiyalara yoluxma hallarında artımlar müşahidə edilir. Bu tip infeksiyalar hava-damcı üsulu ilə ötürüldüyündən qapalı məkanlarda daha sürətlə yayılır".

Bunu "Operativ Media"ya açıqlamasında Səhiyyə Nazirliyinin mütəxəssis-eksperti, infeksionist Təyyar Eyvazov deyib.

Nazirlik mütəxəssisi 5 yaşın altında olan uşaqların qripə qarşı peyvənd olmasına cağırış edib.

"Bütün əhali, o cümlədən uşaqlar da bu infeksiyalara həssasdır və onlar arasında təşkil olunan kollektivlərdə (məktəblər, uşaq baxçaları, internatlar və s.) vaxtaşırı kəskin respirator virus infeksiyalarının alovlanmasına rast gəlinə bilir. Bu infeksiyalardan qeyri-spesifik qorunma tədbirləri eynidir və bu qaydalar haqqında əhali kifayət qədər maarifləndirilib (maskadan istifadə, sosial məsafənin gözlənilməsi, əl gigiyenasına riayət edilməsi və s.

Tövsiyə olunur ki, xəstə uşaqlar istər evdə, istərsə də məktəbdə vaxtında aşkar olunaraq bir müddət kollektivə buraxılmasınlar. Qripə qarşı əsas təsirli spesifik profilaktik tədbir vaksinasiyadır. Birinci növbədə 5 yaşın altında olan, habelə ağır xroniki, o cümlədən tənəffüs sisteminin xəstəliklərindən əziyyət çəkən və immunçatmazlığı olan uşaqlar qripə qarşı peyvənd olunmalıdırlar".

Gülcahan Məmmədova