“Ohanyan xətti” yarıldıqdan sonra Füzuli düşməndən təmizləndi - Millət vəkili
"Füzulinin azad edilməsi Vətən müharibəsinin qazanılmasında həll edici rol oynadı. Azərbaycan vətəndaşı səbirsizliklə Füzuli şəhərinin azad olunması xəbərini gözləyirdi və 2020-ci il oktyabrın 17-sində Ali Baş Komandan bu mesajı verdi. Azərbaycan xalqı bu qələbəni ayaq üstə alqışladı. Bundan sonra daha da ruhlanan ordumuz sıra ilə digər doğma ərazilərimizi işğaldan azad etdi".
Bu sözləri "Operativ Media"ya millət vəkili Razi Nurullayev deyib.
Millət vəkili bildirib ki, "Ohanyan xətti"nin yarılması Füzulinin azad olunmasına gətirib çıxardı:
" "Ohanyan xətti"nin əsas hissələrindən biri Füzulidə qurulmuşdu. O səddi - minalı ərazini keçmək çətin məsələ idi. “Ohanyan xətti” yarıldıqdan sonra Füzulini düşməndən təmizlədi. Ona görə də, Füzulinin işğaldan azad olunması Azərbaycan tarixində önəmli yer tutur. Bu, eyni zamanda müharibənin qazanılmasında əsas addımlardan birdir.
Füzuli azad olunarkən, şəhərdə Azərbaycan bayrağını sancmaq üçün bir dənə də salamat bina tapılmamışdı. Eyni hadisə Cəbrayılda da yaşanmışdı. Füzuli şəhəri azad olunandan sonra yayılan görüntülər Azərbaycan xalqını heyrətə saldı. Ermənistan doğma Füzuli şəhərimizi xarabaya çevirmişdi. Şəhərdə heç bir dənə də salamat bina yox idi. Füzulinin azad olunması tariximizə qızıl hərflərlə yazılıb.
Ermənilər tərəfindən dağıdılmış Füzuli şəhərini Azərbaycan yenidən dirçəldib. Artıq Füzuli sakinləri öz doğma ata-baba yurdlarına geri qayıdıb. Onlar burada əbədi yaşayacaqlar. Bütün dünyaya məlumdur ki, Ermənistan dağıtmaqla məşğul idi. Azərbaycan isə yaradan, quran ölkədir. Artıq Füzuliyə həyat qayıdıb. Füzuli yenidən ikinci həyatını yaşıyır".
