Britaniya Parlamentində Xocalı faciəsi ilə bağlı təşəbbüs irəli sürülüb

Böyük Britaniya Parlamentində Xocalı faciəsinin 33-cü ildönümünə həsr olunmuş erkən gündəlik təklifi (Early Day Motion, EDM) irəli sürülüb.

"Operativ Media" xəbər verir ki, sənəd 25 fevral 2025-ci ildə parlamentə təqdim edilib və üç deputat – Bob Bləkmen (Mühafizəkarlar), Cim Şennon (Demokratik Birlik Partiyası, DUM) və Andrü Rozindell (Mühafizəkarlar) tərəfindən imzalanıb.

Təşəbbüsdə 26 fevral 1992-ci ildə Ermənistan silahlı qüvvələrinin və Rusiyanın 366-cı motoatıcı alayının dəstəyi ilə Xocalıda 613 azərbaycanlının qətlə yetirildiyi vurğulanır. Ölənlər arasında 106 qadın, 63 uşaq və 70 yaşlı insan olduğu qeyd edilir.

Təşəbbüs çərçivəsində Azərbaycan xalqına başsağlığı verilir, Xocalı faciəsinin regiondakı münaqişə çərçivəsində törədilmiş bir cinayət olduğu bildirilir və tərəflərin sülhə sadiqliyi alqışlanır.

Qeyd edək ki, erkən gündəlik təklifləri Böyük Britaniya Parlamentinin İcmalar Palatasında deputatlar tərəfindən hər hansı bir məsələyə diqqət çəkmək və ya öz mövqelərini bildirmək üçün təqdim olunan yazılı bəyanatlardır. Bu cür təşəbbüslər parlamentdə müzakirəyə çıxarılmır, lakin digər deputatlar dəstək məqsədilə onu imzalaya bilərlər. Çox vaxt ictimai və siyasi təşəbbüslərin təşviqi üçün istifadə olunur. Bundan başqa, qanunvericilik qüvvəsinə malik olmasa da, hökumətə və ictimai rəyə təsir göstərə bilər