BMT-nin Baş katibi Antonio Quterreş bəyan edib ki, qurum sülhməramlı əməliyyatları yeni yanaşmaların işlənib hazırlanmasını zəruri edən maneələrlə üzləşir.

Operativ Media xəbər verir ki, o, bu barədə BMT Təhlükəsizlik Şurasında (BMT TŞ) Danimarkanın xarici işlər naziri Lars Lokke Rasmussenin sədrliyi ilə keçirilən BMT-nin sülhməramlı əməliyyatlarının mövcud vəziyyətlərə uyğunlaşdırılmasına dair sessiyada çıxışı zamanı deyib.

Quterreş çıxışında bildirib ki, BMT-nin sülhməramlı əməliyyatları dünyanın ən çıxılmaz bölgələrindəki insanları və icmaları qoruyur və bu əməliyyatlara sülhməramlı missiyalar və xüsusi siyasi missiyalar daxildir.

BMT-nin sülh əməliyyatlarının fəaliyyət sahələrinin erkən xəbərdarlıq sistemlərindən qabaqlayıcı diplomatiyaya, sülh quruculuğundan sülh sazişlərinin monitorinqinə və mülki şəxslərin müdafiəsinə qədər geniş spektri əhatə etdiyini qeyd edən Quterreş söyləyib ki, onun rəhbərlik etdiyi qurum münaqişəli zonalarda atəşkəs danışıqlarının həyata keçirilməsindən tutmuş seçkilərə dəstək və müşahidəçi missiyalarına qədər bir çox kritik vəzifəni yerinə yetirirlər.