Sloveniyalı nazir: "Azərbaycanla qaz təchizatı tərəfdaşlığının daha da gücləndirilməsinə tərəfdarıq"

Sloveniya Azərbaycanla əməkdaşığın gücləndirilməsini səmimiyyətlə arzulayır, xüsusən də qaz təchizatı sahəsində tərəfdaşlığın daha da gücləndirilməsinin tərəfdarıdır.

Operativ Media-nın məlumatına görə, bunu Sloveniyanın ətraf mühit, iqlim və energetika naziri Bojan Kumer Cənub Qaz Dəhlizi Məşvərət Şurası çərçivəsində nazirlərin 11-ci və Yaşıl Enerji Məşvərət Şurası çərçivəsində nazirlərin 3-cü iclaslarında bildirib.

Onun sözlərinə görə, Azərbaycanla Avropanın digər hissəsi arasında əməkdaşlığın əhəmiyyəti gedərək artır: "Burada "yaşıl enerji"ni də qeyd etmək yerinə düşər. Azərbaycanla Sloveniya arasında konstruktiv münasibətlər qurulub. Biz müəyyən dərəcədə kiçik ölkəyik və enerji asılılığımız var. Enerji təchizatının vacibliyini anlayır və bilirik ki, bu, iqtisadi inkişafın əsas meyarıdır"

O bildirib ki, son illər siyasi vəziyyət xeyli dəyişib, bununla da enerji ehtiyatlarının və marşurtlarının şaxələndirilməsi heç vaxt olmadığı qədər vacib olub.

"Bu yeni reallıqdan baxaraq, etibarlı tərəfdaşlıq çox əhəmiyyətlidir. Azərbaycan dəqiqliklə bunu sübuta yetirdi. Sloveniya bu tərəfdaşlığa sadiqdir və Avropa Komissiyasının bu əməkdaşlığın gücləndirilməsindəki səylərini alqışlayır”, - deyə o qeyd edib.

Nazir vurğulayıb ki, Cənub Qaz Dəhlizi çox mühüm marşrutdur və Xəzər dənizi regionunu Avropa bazarlarına bağlayır: “Gələcəyə nəzər salsaq etiraf etməliyik ki, enerji təhlükəsizliyimiz təbii qazla məhdudlaşa bilməz. Azərbaycanın COP29-da sədrliyi aydın siqnala çevrildi ki, biz iqlim dəyişmələri ilə bağlı hərəkətə keçməliyik, bununla bağlı olan mövcud çağırışları aradan qaldırmalıyıq. Beləliklə, qətiyyətli addımlar atmalıyıq və təmiz "yaşıl enerji", həmçinin hidrogen sahəsində əməkdaşlığı gücləndirməliyik. Biz digər təmiz enerji texnologiyalarında da maraqlıyıq və enerji sahəsində əməkdaşlığımızı genişləndiririk”.