Çin hakimiyyəti milli inkişaf maraqlarını qorumaq və ABŞ-ın proteksionizminə qarşı tədbirlər görməkdə davam edəcək.

Operativ Media xəbər verir ki, bu barədə Çin Xarici İşlər Nazirliyinin yaydığı hökumət bəyanatında bildirilir.

Bəyanatda qeyd olunur: “Birləşmiş Ştatlar iki ölkə və bütün dünya xalqlarının ümumi gözləntilərinə uyğun hərəkət etməli, qarşılıqlı fundamental maraqları müdafiə etməli, Çinin iqtisadi və ticarət fəaliyyətini boğmaq üçün tariflərdən silah kimi istifadə etməyi dayandırmalı və Çin xalqının qanuni inkişaf hüququnu pozmağa son qoymalıdır”.

Sənəddə vurğulanır ki, Pekin “problem yaratmır və onlardan qorxmur”, təzyiq və təhdidlər isə “ÇXR ilə iş görmək üçün yanlış yoldur”. “Çin öz suverenliyini, təhlükəsizliyini və inkişaf maraqlarını qorumaq üçün qətiyyətli tədbirlər görüb və görməyə davam edəcək”, – deyə bəyanatda bildirilir.

Qeyd edilir ki, qloballaşma “bəşər cəmiyyətinin inkişafı üçün qaçılmaz bir yol”dur və Çin-Amerika ticarət və iqtisadi əlaqələrinin mahiyyəti qarşılıqlı faydalı əməkdaşlıqdan ibarət olmalıdır. “Ticarət və tarif müharibələrində qalib yoxdur və proteksionizmdən çıxış yolu yoxdur”, – bəyanatda vurğulanır.

Sonda isə qeyd olunur: “Dünyanın hegemonluğa deyil, ədalətə ehtiyacı var”.