ABŞ prezidenti Donald Tramp Ağ Evdə İsrailin baş naziri Benyamin Netanyahu ilə görüşündə Türkiyənin Suriyadakı rolunun və prezident Rəcəb Tayyib Ərdoğanla çox yaxşı əlaqələrinin əhəmiyyətini vurğulayaraq, “O, çox güclü və ağıllı bir insandır” deyib. 

Operativ Media xəbər verir ki, Tramp Ağ Evdə qonaq olan İsrailin baş naziri Netanyahu ilə görüşündə Suriya ilə bağlı diqqətçəkən açıqlamalar verib.

Prezident Ərdoğanla münasibətlərinin çox yaxşı olduğunu vurğulayan Tramp Türkiyənin Suriyadakı rolunun çox əhəmiyyətli olduğuna da diqqət çəkib.

"Mənim Ərdoğanla çox yaxşı münasibətlərim var. Bilirəm ki, mətbuat mənim Ərdoğanı bəyəndiyimə görə üzgündür, amma mən sevirəm, o, məni bəyənir və bizim heç vaxt problemimiz olmayıb", - ABŞ prezidenti qeyd edib.

Türkiyənin Suriyada heç kimin edə bilmədiyi şeyi etdiyini ifadə edən Tramp, "Ərdoğan çox güclü və ağıllı bir adamdır. O, (Suriyada) heç kimin edə bilmədiyi bir şey etdi. Olanı demək lazımdır" deyə bildirib.

İsrailin baş naziri Netanyahunun "Suriyada Türkiyə ilə problemləri olduğu" ifadələrinə cavab verən Tramp, "Türkiyə ilə (Suriya ilə bağlı) hər hansı problemi həll edə biləcəyimi düşünürəm. (Netanyahuya işarə edərək) Nə qədər ki, siz məntiqlisiniz, siz və biz bu mövzuda ağlabatan olmalıyıq" deyib.

"Mənim Türkiyə və onun liderləri ilə çox, çox yaxşı münasibətim var və düşünürəm ki, biz bu problemi həll edə bilərik. Hazırda bunun bir problem olacağını düşünmürəm", - Tramp qeyd edib.