Ceyhun Bayramov BƏƏ-li həmkarını Azərbaycan-Ermənistan arasında normallaşma prosesi barədə məlumatlandırıb - YENİLƏNİB

7 aprel 2025-ci il tarixində Azərbaycan Respublikasının xarici işlər naziri Ceyhun Bayramov Əbu-Dabi Birləşmiş Ərəb Əmirliklərinin (BƏƏ) xarici işlər naziri Abdullah bin Zayed Əl Nəhyan ilə görüşüb.

XİN-dən Operativ Media-ya verilən məlumata görə, görüş zamanı, Azərbaycan-BƏƏ əməkdaşlığının siyasi, iqtisadi, ticarət, energetika, humanitar aspektləri, regional və beynəlxalq təşkilatlar çərçivəsində tərəfdaşlıq, habelə bölgədə cari vəziyyət müzakirə olunub. İki ölkə arasında energetika, xüsusilə də alternativ enerji sahəsində aparılan işlər məmnunluqla qeyd olunub. 

İki ölkə arasında əməkdaşlığın inkişafında siyasi dialoqun, o cümlədən siyasi məsləhətləşmələr mexanizminin əhəmiyyəti qeyd olunub.

Regional və beynəlxalq təşkilatlar çərçivəsində qarşılıqlı dəstək və həmrəyliyin bundan sonra da davam etdirilməsinin vacibliyi vurğulanıb.

Nazir Ceyhun Bayramov, qarşı tərəfi postmünaqişə dövründə regional bərpa və sülh gündəliyi barədə ətraflı məlumatlandırıb, mövcud çağırışlar, o cümlədən mina təhdidi, habelə Ermənistan Konstitusiyası və bir sıra qanunvericilik aktlarında ölkəmizə qarşı davam etdirilən ərazi iddialarından bəhs edib.  

Birləşmiş Ərəb Əmirliklərinin minasızlaşdırma sahəsində dəstəyinin, eləcə də işğaldan azad edilmiş ərazilərimizdə həyata keçirdiyi dəstəyin əhəmiyyəti məmnunluqla qeyd olunub. 

Görüşdə, həmçinin qarşılıqlı maraq doğuran digər ikitərəfli və regional məsələlər ətrafında fikir mübadiləsi aparılıb.

***
09:36

Azərbaycan Respublikasının xarici işlər naziri Ceyhun Bayramov Birləşmiş Ərəb Əmirliklərinə işgüzar səfəri çərçivəsində Birləşmiş Ərəb Əmirliklərinin xarici işlər naziri Şeyx Abdullah Bin Zayed Əl Nəhyan ilə görüş keçirib.

Operativ Media xəbər verir ki, bu barədə Azərbaycan XİN-nin "X" hesabında paylaşım edilib.

Nazirlər iqtisadiyyat, ticarət, enerji, eləcə də regional və qlobal hadisələrə xüsusi diqqət yetirməklə həm ikitərəfli, həm də çoxtərəfli əməkdaşlığı müzakirə ediblər.

Qarşılıqlı faydalı əməkdaşlıq sahələrinin daha da inkişaf etdirilməsinin istəyi vurğulanıb.

Nazirlər regional vəziyyətlə bağlı geniş fikir mübadiləsi aparıblar.

Ceyhun Bayramov həmkarına regionda münaqişədən sonrakı vəziyyət, aparılan yenidənqurma, minatəmizləmə işləri və Azərbaycan-Ermənistan arasında normallaşma prosesi, eləcə də Ermənistan Konstitusiyasında ərazi iddiası kimi qalan problemlər barədə də məlumat verib.