ABŞ Prezidenti Tramp Oval Ofisdə prezident sərəncamlarına imza mərasimindən sonra jurnalistlərin gündəmlə bağlı suallarını cavablandırıb.

Operativ Media xəbər verir ki, Tramp, ABŞ olaraq şənbə günü İranla birbaşa danışıqlar aparacaqlarını və buradan müsbət nəticə çıxmasının hər kəs üçün daha yaxşı olacağını qeyd edib.

ABŞ Prezidenti, İranda insanların çox ağıllı və zəkalı olduqlarını, mövcud vəziyyətin tam fərqində olduqlarını söyləyərək, İranla razılaşma məsələsində "çox şey istəmədiyini" vurğulayıb.

İranın heç bir halda nüvə silahına sahib ola bilməyəcəyini bildirən Tramp, Tehranla razılaşma əldə olunmaması halında nə baş verəcəyi sualına belə cavab verib:

"Əgər hərbi müdaxilə tələb olunarsa, hərbi müdaxilə edəcəyik. İsrailin də bu prosesə daxil olacağı aydındır. Ancaq lider biz olarıq, heç kim bizə liderlik edə bilməz. Biz istədiyimizi edərik."

Tramp bildirib ki, Rusiya ilə Ukraynanın mütləq razılaşmaya gələcəyinə ümid edir və bunun üçün çox çalışdıqlarını da sözlərinə əlavə edib.