ABŞ Konqresinin Nümayəndələr Palatasında demokratlar anti-Rusiya sanksiyalarının sərtləşdirilməsi və Ukraynaya dəstəyin artırılması ilə bağlı qanun layihəsi təqdim ediblər.

Operativ Media xəbər verir ki, bu barədə bazar ertəsi "Reuters" mənbələrə istinadən məlumat yayıb.

Məlumatda qeyd edilir ki, sənəddə Ukraynanın “təhlükəsizliyi və bərpası”nın təmin edilməsi, habelə “Rusiyaya qarşı sərt sanksiyaların tətbiqi” sahəsinə vəsaitin ayrılması ilə bağlı müddəalar var. Qanun layihəsi Nümayəndələr Palatasının Xarici Əlaqələr Komitəsinin yüksək səviyyəli demokratı Qreqori Miks tərəfindən dəstəklənib.

Agentlik qeyd edir ki, hazırda Konqresin hər iki palatasında azlıqda olan demokratların qanun layihəsi ABŞ-dən Kiyevə hərbi dəstəyin davam etdirilməsinə ümid edən siyasi rəqibləri tərəfindən Respublikaçı prezident Donald Trampın administrasiyasına təzyiq elementidir. "Reuters" etiraf edir ki, sənəd hazırkı formada qəbul edilməsə belə, onun bəzi müddəaları ABŞ Konqresində qəbul oluna biləcək Ukrayna ilə bağlı ikitərəfli qanun layihəsinə daxil edilə bilər.

Aprelin əvvəlində hər iki partiyadan bir qrup konqres senatoru Ukrayna münaqişəsinin həlli ilə bağlı Vaşinqtonun təklif etdiyi ideyaları rədd edərək, Rusiya və onun ticarət tərəfdaşlarına qarşı ilkin və ikinci dərəcəli sanksiyaların tətbiqini nəzərdə tutan qanun layihəsi təqdim ediblər. Təklifdə Rusiyadan neft, qaz, uran və digər mallar alan ölkələrdən mallara 500% idxal rüsumları daxil edilib. Qanun layihəsini senatorlar Lindsi Qrem və Riçard Blumental təqdim ediblər.