Kanadanın baş naziri Qəzzadakı hadisələri soyqırım adlandırmaqdan imtina edib

Kanadanın baş naziri və hakim Liberal Partiyasının lideri Mark Karni Qəzza zolağındakı vəziyyəti soyqırım adlandırmaqdan imtina edib.

Operativ Media xəbər verir ki, o, bunu növbədənkənar parlament seçkiləri ərəfəsində milli televiziya kanallarında yayımlanan debat zamanı deyib.

"Yaxın Şərqdə Qəzza zolağında vəziyyət dəhşətlidir, lakin mən vəziyyəti siyasiləşdirməmək üçün heç vaxt siyasətdə bu sözü işlətmirəm".

Müzakirələr zamanı müxalif Yeni Demokrat Partiyasının lideri Caqmet Sinq xüsusilə Qəzza zolağındakı vəziyyətin soyqırım kimi tanınmasına çağırıb.

Bundan əvvəl Fələstinin HƏMAS radikal hərəkatı İsraili Fələstin xalqına qarşı soyqırımda ittiham edərək, onun Qəzza zolağındakı hərəkətlərini 1994-cü ildə Ruandada törədilən soyqırımı ilə müqayisə edib.