ABŞ prezidenti Donald Tramp Miçiqan ştatında etdiyi çıxışda ikinci müddətinin ilk 100 gününü dəyərləndirib.

Operativ Media xəbər verir ki, prezident olduğu ilk 100 gündə xüsusilə sərhəd təhlükəsizliyi və iqtisadiyyatla bağlı mühüm addımlar atdığını ifadə edən Tramp, “100 gündə Vaşinqtonda təxminən 100 ilin ən radikal dəyişikliyini etdik” deyə bildirib.

Çıxışının böyük hissəsini sərhəd təhlükəsizliyini təmin etmək üçün atdıqları addımlar və iqtisadiyyatda etdiklərini danışmağa sərf edən Tramp, təxminən 3 ay ərzində həm daxili, həm də xarici siyasətdə mühüm işlər gördüklərini bildirib.

Çinə tətbiq edilən tariflərlə bağlı Tramp, “Dünya tarixinin ən böyük iş oğurluğuna son qoyuruq” deyib. 

Bununla belə, Tramp bunun Çinlə anlaşmayacaqları anlamına gəlmədiyini vurğulayaraq, "Hal-hazırda tarif 145 faizdir, ona görə də əslində sıfırla arasında böyük fərq var, amma düşünürəm ki, bu, nəticə verəcək. Onlar razılaşmaq istəyirlər və biz də edəcəyik, amma ədalətli bir razılaşma olacaq" deyə bildirib.