Senatorlar Con Körtis (R-Yuta) və Ceff Merkli (D-Oreqon) ABŞ Konqresinin yuxarı palatasına Tayvanla əlaqələrin dərinləşdirilməsini nəzərdə tutan qanun layihəsi təqdim ediblər.

Operativ Media xəbər verir ki, bu qanun layihəsi Tayvandakı Amerika İnstitutunun (ABŞ-nin faktiki səfirliyi) direktorunun Senat tərəfindən təsdiq olunmasını təmin edir və federal hökumətə Tayvan siyasəti ilə bağlı idarələrarası işçi qrupu yaratmağı tapşırır. Həmçinin sənəddə bildirilir ki, ABŞ administrasiyası Tayvanın beynəlxalq təşkilatların fəaliyyətində iştirakını asanlaşdırmalı və adaya tamhüquqlu üzv statusu verilməsinə çalışmalıdır.

Qanun layihəsində Vaşinqton və Taypey arasında ticarət və iqtisadi əlaqələrin gücləndirilməsi, eləcə də təhlükəsizlik sahəsində əməkdaşlığın dərinləşdirilməsi zərurəti vurğulanır.

Bundan əlavə, sənəd Tayvan hərbçilərinin ikitərəfli və çoxtərəfli hərbi təlimlərə dəvət olunmasını, həmçinin ABŞ və Tayvan arasında kommersiya məqsədli silah tədarükünə dair müntəzəm məsləhətləşmələrin aparılmasını nəzərdə tutur.