Mariya Zaxarova yazılı açıqlamasında ABŞ prezidenti Donald Trampın Ukrayna və Rusiya üzrə xüsusi nümayəndəsi Keyt Kelloqun "Fox News" telekanalına verdiyi müsahibədə “Rusiya ilə Ukrayna arasında 30 günlük atəşkəs üçün yeganə maneənin Rusiya prezidenti Vladimir Putinin bu təklifə qarşı çıxması olduğunu” söyləyən açıqlamalarını tənqid edib.
Operativ Media xəbər verir ki, Rusiyanın heç vaxt atəşkəsə qarşı olmadığını vurğulayan Zaxarova bunu iki dəfə nümayiş etdirdiklərini bildirib.
Zaxarova Trampın mart ayında “enerji infrastrukturu obyektlərinə hücumları 30 gün müddətinə dayandırmaq” təklifini dəstəklədiklərini və Rusiyanın Pasxa bayramında atəşkəs elan etdiyini xatırladaraq, “Kiyevin bunlara əməl etməsi uzunmüddətli atəşkəsə doğru bir addım ola bilərdi. Təəssüf ki, Kiyev hər ikisini sabotaj etdi”, - deyə bildirib.