İran İstanbulda İngiltərə, Fransa və Almaniya ilə nüvə məsələsini müzakirə edəcək

İran ilə 2015-ci ildə bağlanmış nüvə sazişinin Avropa tərəfləri kimi tanınan E3 ölkələri, İranın nüvə proqramı və sanksiyaların aradan qaldırılması məsələlərini müzakirə etmək üçün 16 May tarixində İstanbulda görüş keçirəcəklər.

Operativ Media xəbər verir ki, bu haqda "Irannuances" xəbər saytı məlumat yayıb.

Görüşün nazir müavinləri və yüksək səviyyəli diplomatlar tərəfindən aparılacağı qeyd olunub.

İran ilə ABŞ arasında Oman vasitəçiliyi ilə davam edən nüvə danışıqları davam edir və tərəflər bu danışıqları müsbət qiymətləndiriblər. Danışıqlarda İran, ABŞ-nin birtərəfli sanksiyalarını aradan qaldırması qarşılığında nüvə proqramını məhdudlaşdırmağa hazır olduğunu bildirib. Bu müzakirələrdə Avropa ölkələri iştirak etmir.

İran ilə E3 arasında 2 May tarixində Romada görüş keçirilməsi planlaşdırılmışdı, lakin ABŞ ilə İran arasındakı danışıqların təxirə salınmasından sonra bu görüş ləğv edilmişdi.