İran XİN rəhbəri: Uranı zənginləşdirmək hüququndan əl çəkməyəcəyik

İranın xarici işlər naziri Abbas Araqçi ABŞ-ylə danışıqlarda etimad yaratmaq üçün addımlar atmağa hazır olduqlarını, lakin uranın zənginləşdirilməsi hüquqlarından əl çəkməyəcəklərini bildirib.

Operativ Media xəbər verir ki, Tehran Beynəlxalq Kitab Sərgisini ziyarət edərək "Kitablar və Diplomatiya" adlı proqrama qatılan Araqçi burada ictimaiyyətin və mətbuat mənsublarının suallarını cavablandırıb.

ABŞ-dən gələn və İranın nüvə proqramını tamamilə dayandırmasını tələb edən açıqlamalarla bağlı suala cavab verən Araqçi “Mətbuatda yayımlananlar masa arxasında deyilənlərlə üst-üstə düşmür və bir media savaşı gedir. ABŞ-dən bir çox ziddiyyətli açıqlamalar eşidirik. Bu, Vaşinqtondakı diqqətsizlikdənmi, yoxsa danışıqlar üslubundanmı qaynaqlanır deyə suallar yaranır. Lakin bu, İranın üslubu deyil. İran isə öz əsas prinsipləri və mövqelərinin arxasında durur", - deyə bildirib.

İranın etimad yaradacaq addımlar atmağa hazır olduğunu, lakin uranı zənginləşdirmək hüququndan imtina etməyəcəyini bildirən Araqçi əlavə edib:

“Nə mətbuatda, nə də danışıqlar masasındakı mövqelərimizdə bu məsələdə heç bir güzəştə getməyəcəyik. Bu, İran xalqının haqqıdır və heç kim bunu inkar edə bilməz. Nüvə proqramı ilə bağlı şəffaflığı təmin edə bilərik, lakin nüvə obyektlərindən heç birinin bağlanması məsələsi gündəmdə deyil".