Fələstin Dövlət Başçısı Mahmud Abbas ilə Avropa İttifaqı (Aİ) Şurasının Prezidenti Antonio Kosta İsrailin Qəzza zolağına qarşı hücumlarının dayandırılması məsələsini müzakirə ediblər.

Operativ Media Fələstinin rəsmi xəbər agentliyi WAFA-ya istinadən xəbər verir ki,  Abbas ilə Kosta telefon danışığı aparıblar.

Danışıq zamanı tərəflər arasında "Fələstindəki son hadisələr, müharibənin dayandırılması yolları və Qəzza zolağına humanitar yardımın çatdırılması məsələləri" müzakirə olunub.

Bildirilib ki, İsraillə yanaşı, fələstin torpaqlarını zəbt edən israilli köçkünlərin işğal altındakı İordan çayının qərb sahili və Şərqi Qüdsdəki hücumları, eləcə də Fələstin administrasiyasına ayrılan vəsaitlərin qarşısının alınması məsələləri də müzakirə olunub.

“Biz Aİ-nin iki dövlətli həll, İsrailin yaşayış məntəqələri, müharibənin dayandırılması və yardımların göstərilməsi məsələlərindəki qəti mövqeyini yüksək qiymətləndiririk", - deyə Fələstin prezidenti bildirib.