Ağ Ev: Rusiya və Ukraynanın gələn həftə İstanbulda birbaşa danışıqlar aparacağına ümid edirik

Ağ Ev sözçüsü Lievitt Rusiya-Ukrayna prosesi ilə bağlı qiymətləndirmələr aparıb.

Operativ Media xəbər verir ki, o, bu haqda keçirdiyi mətbuat brifinqində danışıb.

Lievitt “Anladığım qədərilə və ümid edirik ki, Rusiya ilə Ukrayna gələn həftə İstanbulda birbaşa görüşlər və danışıqlar aparacaqlar. Bu görüşün baş tutacağına inanırıq. Bu, Prezidentin (Donald Tramp) hər iki tərəfin bir araya gələrək birbaşa danışıqlar aparmaları üçün təşviq və israr etdiyi bir görüşdür", - deyə bildirib.

ABŞ-li sözçü bildirib ki, müharibənin başlanğıcından bəri Tramp bu münaqişəni sona çatdırmaq istədiyini açıq şəkildə ifadə edib və bu səbəbdən həm Rusiya Prezidenti Vladimir Putinə, həm də Ukrayna Prezidenti Volodimir Zelenskiyə dəfələrlə birbaşa görüş çağırışı edib.

Lievitt həmçinin Trampın bu görüşlərə ABŞ-dan nümayəndə göndərib-göndərməyəcəyi ilə bağlı verilən sualı belə cavablandırıb:

“Hələlik bəlli deyil, Prezidentin nümayəndə göndərməyi planlaşdırıb-planlaşdırmadığını sizə bildirəcəyik".