“Buzlaqların qorunması” üzrə Yüksək səviyyəli Beynəlxalq Konfransda Azərbaycanın nümayəndə heyəti iştirak edir

Tacikistan Respublikasının paytaxtı Düşənbə şəhərində işini başlayan və 41 ölkənin və 57 beynəlxalq təşkilatın təmsil olunduğu ilk “Buzlaqların qorunması” üzrə Yüksək səviyyəli Beynəlxalq Konfransda Azərbaycanın nümayəndə heyəti iştirak edir.

Nazirlər Kabinetinin Mətbuat xidmətindən Operaiv Media-ya verilən xəbərə görə, Baş nazirin müavini Samir Şərifovun rəhbərlik etdiyi nümayəndə heyətində Ekologiya və Təbii Sərvətlər Nazirliyi və Xarici İşlər Nazirliyinin rəsmiləri təmsil olunurlar.

Tədbir, Tacikistan Respublikasının Prezidenti Emoməli Rəhmonun təşəbbüsü ilə Birləşmiş Millətlər Təşkilatının 2025-ci ili “Beynəlxalq Buzlaqların Qorunması İli” elan etməsi çərçivəsində keçirilir və qlobal iqlim dəyişikliyi ilə mübarizə şəraitində buzlaqların mühüm roluna diqqət çəkir.

30 may tarixində konfransın plenar iclasında çıxış edən Samir Şərifov, 2024-cü ildə Azərbaycan Respublikasının Prezidentinin rəhbərliyi altında Bakıda keçirilmiş BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına (COP29) Azərbaycanın uğurlu ev sahibliyi ilə uzun illər ərzində razılaşdırılmamış məsələlərdə mühüm irəliləyişlərin əldə olunduğunu, inkişaf etməkdə olan ölkələrin iqlim dəyişiklikləri ilə mübarizəsi üçün ildə 300 milyard ABŞ dollarına qədər iqlim maliyyələşməsinin ayrılmasını, İtki və Zərər Fondunun yaradılmasını və karbon kreditləri ilə ticarəti tənzimləyən hüquqi çərçivənin razılaşdırılmasını xüsusilə vurğulayıb.