İcraiyyə Şurasına üzvlük Azərbaycanla UN-Habitat arasında əməkdaşlığa növbəti töhfələr üçün fürsət yaradacaq

Xəbər verdiyimiz kimi, mayın 30-da BMT-nin Məskunlaşma Assambleyasının 2-ci sessiyası çərçivəsində keçirilən seçkilərdə Azərbaycan BMT Məskunlaşma Proqramının (UN-Habitat) İcraiyyə Şurasına ilk dəfə olaraq üzv seçilib. Bu üzvlük 2025-2029-cu illəri əhatə edəcək.

Operativ Media xəbər verir ki, İcraiyyə Şurası UN-Habitat-ın ali orqanı olan BMT Məskunlaşma Assambleyasının sessiyalararası fəaliyyət göstərən qərarverici orqanıdır.

Şuranın tərkibi BMT-nin regional qrupları üzrə müəyyənləşdirilən üzv dövlətlərdən ibarətdir. UN-Habitat-ın fəaliyyəti ilə bağlı bir çox qərarların üzərində müzakirələr İcraiyyə Şurasında başlandığından və razılaşdırma üçün hazırlandığından dövlətlər şuraya üzv olmağa can atır.

Bu səbəbdən bir çox hallarda ölkələr öz regional qrupları arasında Şuraya üzvlüklə bağlı konsensus üçün seçkilərdən xeyli müddət əvvəl danışıqlara başlayır.

Azərbaycan BMT-nin Şərqi Avropa regional qrupunda (Eastern European Group-EEG) təmsil olunur. İcraiyyə Şurasında üzvlüyə EEG-dən Azərbaycanla yanaşı, Ukrayna, Rusiya, Slovakiya və Çexiya da namizədliyini irəli sürmüşdü.

Cari ilin əvvəlindən UN-Habitat və EEG üzv dövlətlər arasında çoxsaylı müzakirələrdən sonra Çexiya namizədliyini geri götürüb və qrupdan namizədlər müəyyənləşib.

Məlum olduğu kimi, dayanıqlı şəhərsalma və insan məskənləri sahəsində ixtisaslaşmış UN-Habitat ilə Azərbaycan arasında əməkdaşlıq yüksələn xətt üzrə dinamik inkişaf edir. Azərbaycan UN-Habitat-ın ən böyük donorlarındandır.

Ölkəmiz 2023-cü ildə UN-Habitat-ın Ümumdünya Məskunlaşma Gününə ev sahibliyi edib. Azərbaycan qlobal nüfuza malik olan, on minlərlə iştirakçının qatıldığı BMT-nin Ümumdünya Şəhərsalma Forumunun 13-cü sessiyasına (WUF13) 2026-cı il mayın 17-22-də ev sahibliyi edəcəkdir. İcraiyyə Şurasına üzvlük Azərbaycanla UN-Habitat arasında əməkdaşlığa növbəti töhfələr vermək üçün fürsəti yaradacaq.