Ağ Ev İrana qarşı yeni sanksiyaların dayandırılması barədə göstəriş verib.

Operativ Media xəbər verir ki, bu barədə bazar günü "The Wall Street Journal" öz mənbələrinə istinadən məlumat yayıb.

Məlumata görə, ötən həftə Ağ Evin mətbuat katibi Kerolin Leavitt Dövlət Departamentinə, Maliyyə Departamentinə və Milli Təhlükəsizlik Şurasına “İrana qarşı yeni sanksiyaların tətbiqi üçün bütün fəaliyyətləri dayandırmaq” tələbi ilə direktiv göndərib. Nəticədə ABŞ Prezidenti Donald Trampın İran İslam Respublikasına qarşı “maksimum təzyiq” kampaniyası faktiki olaraq dalana dirənib.

Leavittin müavini Anna Kelli nəşrə verdiyi şərhdə bu məlumatı birbaşa təkzib etməyib. Lakin o bildirib ki, “sanksiyalarla bağlı istənilən yeni qərar ya Ağ Ev, ya da müvafiq departamentlər tərəfindən açıqlanacaq”. Qəzet qeyd edir ki, Vaşinqton sonuncu dəfə mayın 21-də Tehrana qarşı məhdudiyyətlər tətbiq edib və o vaxtdan bəri Maliyyə Nazirliyi yeni sanksiyaların elanını ən azı iki dəfə təxirə salıb.