Xarici əlamətlərə əsasən qaraciyər probleləmlərini necə müəyyən etmək olar? – HƏKİM DANIŞDI

Qaraciyər insan orqanizmində qarın boşluğunda yerləşən, bir çox həyati funksiyaları yerinə yetirən vacib orqandır. Lakin onun üzərində sinir hüceyrələri olmadığı üçün ağrı hissi müşahidə olunmur. Bu səbəbdən də əksər hallarda qaraciyər xəstəlikləri gecikmiş mərhələlərdə müəyyən olunur.

Terapevt Sübhan Hacıyev Operativ Media-ya bildirib ki, qaraciyər xəstəliklərinin xarici əlamətləri yalnız xəstəliyin irəliləmiş mərhələlərində ortaya çıxır:

“Bu hallarda pasiyentlər müayinələrə yönləndirilir. Ən çox müşahidə edilən əlamətlər arasında halsızlıq, solğunluq və bədəndə sarılıqdır.  Bu zaman qanda bilirubin maddəsinin səviyyəsi artır və nəticədə insanın bədənində, üzündə, göz sklerasında saralmalar yaranır.”

S. Haciyev qeyd edib ki, bu hallar xüsusilə Hepatit B, Hepatit C, qaraciyər sirrozu və öd yollarının tutulması zamanı müşahidə olunur.

Bundan əlavə, polimar elitema xəstəliyi zamanı əllərin içində qızartılar yaranır ki, bu da qaraciyər xəstəliyinin xarici əlamətlərindən biri hesab olunur.

“Digər simptomlardan biri də 'hörümçək aniyomalar' adlandırdığımız üz, sinə və qol nahiyələrindəki damar ovucluqlarıdır,”– deyə həkim əlavə edib.

Terapevtin sözlərinə görə, qaraciyərin sirrotik və fibrotik xəstəlikləri zamanı qarın boşluğuna maye yığılır, xroniki anemiya və zülal çatışmazlığı yaranır. Bu zaman pasiyentlərdə təzyiq şikayətləri baş verir və onlar bəzən yanlış olaraq kardioloqlara müraciət edirlər.

Sonda Sübhan Haciyev vətəndaşlara çağırış edib:

“Bu əlamətləri özündə müşahidə edən hər kəs vaxtında həkim müayinəsindən keçməlidir.”

Şəfa Hüseynli