Bu gün Bakıda Ukrayna-Azərbaycan Hökumətlərarası İqtisadi Əməkdaşlıq Komissiyasının 13-cü iclası keçirilib.

Operativ Media xəbər verir ki, Ukrayna nümayəndə heyətinə energetika naziri Herman Qaluşçenko rəhbərlik edib.

İclasın yekunlarına dair Qaluşçenko "Facebook" sosial şəbəkəsində qeyd edib ki, yekunda tərəflər protokol və yol xəritəsini (iqtisadiyyat, energetika, ticarət, mədəniyyət, logistika, nəqliyyat, təhsil və elm sahələrində birgə fəaliyyətlərin ətraflı planını) imzalayıblar.

"Danışıqlar zamanı xüsusi diqqət Avropa diversifikasiya siyasəti kontekstində Azərbaycan qazının Ukraynaya tədarükü məsələlərinə, həmçinin enerji təhlükəsizliyinin artırılması və bərpa olunan enerji mənbələrinin inkişafı üçün Ukrayna yeraltı qaz anbarlarından istifadə imkanlarına yönəldilib. Ukrayna nümayəndə heyəti ölkənin enerji infrastrukturunun bərpasına yönəlmiş (transformatorlar və enerji avadanlıqları da daxil olmaqla) göstərilən humanitar yardıma görə Azərbaycana səmimi təşəkkürünü bildirib", - nazir qeyd edib.

***

14:48

Bakıda Azərbaycan Respublikası və Ukrayna arasında iqtisadi əməkdaşlıq məsələləri üzrə Hökumətlərarası Komissiyanın 13-cü iclası keçirilib.

Operativ Media xəbər verir ki, iclasdan əvvəl komissiyanın həmsədrləri, Azərbaycanın energetika naziri Pərviz Şahbazov ilə Ukraynanın energetika naziri German Galushchenko arasında görüş olub. Görüşdə ikitərəfli münasibətlərin qarşılıqlı etimada və səmərəli tərəfdaşlığa əsaslandığı vurğulanıb. Azərbaycanın Ukraynaya davamlı humanitar dəstəyinə görə minnətdarlıq ifadə edilib. Müxtəlif sahələrdə əməkdaşlığın inkişafına dair fikir mübadiləsi aparılıb.

Hökumətlərarası Komissiyanın hibrid formatda keçirilən iclasında iki ölkə arasında siyasi, iqtisadi, ticarət və sənaye, enerji, nəqliyyat və informasiya-kommunikasiya texnologiyaları, elm və təhsil, mədəniyyət sahələrində əməkdaşlığın cari vəziyyəti və potensial imkanlar müzakirə edilib. Komissiyanın həmsədri, energetika naziri Pərviz Şahbazov bildirib ki, Komissiya çərçivəsində Fəaliyyət Planının qəbulu ölkələr arasında əməkdaşlığı yeni mərhələyə yüksəldəcək, enerji, faydalı qazıntılar, kənd təsərrüfatı və digər perspektivli sahələrdə, həmçinin sənaye parkları və azad iqtisadi zonalarda mövcud imkanlardan geniş istifadəni təşviq edəcək.

Komissiyanın Ukrayna tərəfindən həmsədri, energetika naziri German Galushchenko isə deyib ki, ölkələrimizi güclü tarixi əlaqələr, qarşılıqlı hörmət, regional əməkdaşlıq və davamlı inkişaf üçün ortaq baxış birləşdirir. “Ukrayna Azərbaycan ilə strateji tərəfdaşlığa böyük əhəmiyyət verir. Azərbaycan Ukraynanı enerji avadanlıqları ilə dəstəkləyən ilk ölkələrdən biri olub və enerji sahəsində göstərilən bu dəstək bizim üçün həyati rol oynayıb. İnanırıq ki, bu iclas ölkələrimiz arasında uzunmüddətli tərəfdaşlığın əsaslarını gücləndirmək üçün yeni birgə təşəbbüsləri müəyyən etməyə imkan verəcək”, -deyə nazir əlavə edib.

Müzakirələrdən sonra Hökumətlərarası Komissiyanın iclasının yekunlarına dair Protokol imzalanıb. Komissiyanın 14-cü iclasının Kyiv şəhərində keçirilməsinə qərar verilib. 

***

14:33

Energetika naziri German Qaluşçenko ilə Azərbaycan–Ukrayna münasibətlərinin bütün sahələrdə inkişafı istiqamətində səmərəli müzakirələr aparılıb.

Operativ Media xəbər verir ki, bunu Energetika naziri Pərviz Şahbazov "X" sosial şəbəkə hesabında yazıb.

"Həmsədrliyin iştirakı ilə keçirilən Azərbaycan–Ukrayna Hökumətlərarası Komissiyasının 13-cü iclasında qəbul edilmiş Fəaliyyət Planı iki ölkə arasında əməkdaşlığın dərinləşməsinə xidmət edəcək", - deyə o qeyd edib.