Türkiyə XİN: Azərbaycan və Ermənistan arasında əldə olunan irəliləyişdən məmnunuq

Türkiyə Xarici İşlər Nazirliyi, Azərbaycan və Ermənistan arasında qalıcı sülhün təmin olunmasına yönəlik əldə olunan irəliləyişi və bu çərçivədə 8 avqustda Vaşinqtonda qeydə alınan iradəni məmnuniyyətlə qarşıladığını bildirib.

Operativ Media xəbər verir ki, nazirlikdən verilən bəyanatda vurğulanıb ki, beynəlxalq münaqişə və böhranların getdikcə artdığı bir dövrdə atılan bu addım, regional sülh və sabitliyin təmin olunması baxımından son dərəcə mühüm hadisədir.

Türkiyə ABŞ Administrasiyasının prosesə verdiyi töhfələri də yüksək qiymətləndirib.

Açıqlamada qeyd olunub ki, Cənubi Qafqazın sülh və rifaha qovuşması istiqamətində tarixi bir fürsət yaranıb. Türkiyə bu fürsətin reallaşması üçün göstərilən səylərə dəstəyini davam etdirəcəyini və “can Azərbaycan”ın fədakarlıqla apardığı fəaliyyətləri dəstəkləyəcəyini bəyan edib.