Mirziyoyev: Azərbaycan Mərkəzi Asiya ilə Avropanı birləşdirən strateji körpü rolunu oynayır

“Azərbaycan Mərkəzi Asiya ilə Avropanı birləşdirən strateji körpü rolunu oynayır”.

Operativ Media xəbər verir ki, bunu Özbəkistan Prezidenti Şavkat Mirziyoyev “Özbəkistan, Azərbaycan və Avropa – Ümumi İnkişaf Naminə Əməkdaşlıq” Yüksək Səviyyəli Görüşün iştirakçılarına müraciətində bildirib.

"Son illər Özbəkistan-Azərbaycan əlaqələri qarşılıqlı etimad və dəstək ruhunda dinamik şəkildə inkişaf edir. Müttəfiqlik münasibətləri haqqında Müqavilə imzalanıb, Ali Dövlətlərarası Şura fəal şəkildə fəaliyyət göstərir.

Biz Azərbaycan Prezidenti İlham Əliyevin yeni regional proseslərin inkişafına töhfə verməyə hazır olmasını və Cənubi Qafqaz və Mərkəzi Asiya arasında qarşılıqlı əlaqələrin gücləndirilməsi istiqamətində yorulmaz səylərini dərindən qiymətləndiririk.

Fürsətdən istifadə edərək, biz dost Azərbaycan xalqını böyük tarixi nailiyyəti – bu yaxınlarda ABŞ-nin vasitəçiliyi ilə Vaşinqtonda Ermənistanla Üçtərəfli Birgə Bəyannamənin imzalanması münasibətilə bir daha səmimi qəlbdən təbrik edirik".