De Byazi: "Hesab açıldıqdan sonra sakitliyimizi itirdik"

Azərbaycan millisinin baş məşqçisi Canni De Byazi AVRO-2024-ün seçmə mərhələsinin I turunda Avstriyaya qarşı səfər matçını şərh edib.

"Operativ Media" xəbər verir ki, italyan mütəxəssis 1:4 hesabı ilə məğlub olduqları oyundan sonra təşkil edilən mətbuat konfransında bunları deyib:

“27-ci dəqiqəyə kimi bərabər oyun gedirdi. İlk qola qədər elə böyük problemimiz olmurdu. Öz oyunumuzu göstərməyə çalışır, top saxlayırdıq. Hesab açıldıqdan sonra sakitliyimizi itirdik. Son dəqiqələrə qədər bizim üçün çətin oldu və əziyyət çəkdik”.

Təcrübəli mütəxəssis buraxılan qollar zamanı yol verilən səhvlər barədə danışıb:

“Hesab açılana qədər bərabər oyunu saxlamağa çalışırdıq. Ardınca səhvdən top buraxdıq. İkinci qoldan sonra komanda inamını bir az itirdi”.

De Byazi millidə debüt edən Yusif İmanov və Azər Əliyevin oyununu dəyərləndirib:

“Gələcəkdə bizim üçün lazımlı ola bilərlər. Azər Əliyev təcrübəli oyunçudur. Elvin Cəfərquliyevin sarı vərəqəsi olduğu üçün onu əvəzlədik. Bəxtiyar Həsənalızadə və Anton Krivotsyuk arasında şübhəm var idi. Uzaq səfərdən gəldiyinə görə Antonun hazır olmadığını düşündük və Bəxtiyara şans verdik”.