Azərbaycan Respublikasının Rusiya sülhməramlı kontingentinin müvəqqəti yerləşdiyi ərazilərində fəaliyyət göstərmiş qanunsuz erməni silahlı birləşmələri tərəfindən ötən müddət ərzində törədilmiş çoxsaylı terrorçuluq cinayətlərinin araşdırılması ilə bağlı Dövlət Təhlükəsizliyi Xidmətində ibtidai istintaq aparılır.
Belə ki, toplanılmış sübutlar əsasında hazırda Ermənistan Respublikasının vətəndaşı olan 1968-ci il təvəllüdlü Vardanyan Ruben Karlenoviçin Azərbaycan Respublikası Cinayət Məcəlləsinin 214.1 (terrorçuluğu maliyyələşdirmə), 279.3 (qanunvericiliklə nəzərdə tutulmayan silahlı birləşmələrin və ya qrupların yaradılmasında və fəaliyyətində iştirak etmə) və 318.1-ci (Azərbaycan Respublikasının dövlət sərhədini qanunsuz olaraq keçmə) maddələri ilə nəzərdə tutulan cinayət əməllərini törətməsinə dair əsaslı şübhələr müəyyən edilmişdir.
Hüquqşünas Elşad İsayev “Operativ Media”ya açıqlamasında bildirib ki, Ruben Vardanyanı ömürlük azadlıqdan məhrumetmə cəzası gözləyir.
E.İsayev qeyd edib ki, təqsirləndirilən şəxs sülh və bəşəriyyətin təhlükəsizliyi əleyhinə müharibə cinayəti və insanlıq əleyhinə cinayət törədib.
“Hər bir cinayətdə cinayət məsuliyyətinə cəlb etmə müddəti olur, ancaq bu R.Vardanyanın törətdiyi cinayətlərdə artıq müddət məsələsi yoxdur”.
“Nə vaxt tutulmasından asılı olmayaraq, onu ömürlük azadlıqdan məhrumetmə cəzası gözləyir, çünki beynəlxalq konvensiyalara əsasən, Cenevrə Konvensiyasının tələblərinə əsasən həmin cinayətlər hansı dövlətdə törədilsəydi, həmin dövlət öz qanunvericiliyi ilə onu cinayət məsuliyyətinə cəlb edilə bilərdi.
Onun əməlləri Azərbaycan Respublikasının ərazisində törədilib, Xocalı bizim işğal olunmuş ərazimizdir və suverenliyimiz altında beynəlxalq təşkilatlar tərəfindən tanınır.
Ruben Vardanyan Azərbaycan Respublikası və vətəndaşlarına qarşı sülh və bəşəriyyətin təhlükəsizliyi, eyni zamanda müharibə cinayətləri və insanlıq əleyhinə cinayət törədib. Buna görə də o, Azərbaycan Respublikası Cinayət Məcəlləsində nəzərdə tutulmuş qaydada cinayət məsuliyyətinə cəlb olunacaq ki, bu cür əməllər üçün ömürlük azadlıqdan məhrumetmə cəzası tətbiq olunur”.
Sevinc İbrahimzadə
