Sürücü hər zaman öz hüquqlarını və vəzifələrini bilməlidir. Bunlardan biri də avtomobilin cərimə meydançasına aparılma prosesidir.
Bəs avtomobil hansı halda cərimə meydançasına aparılır?
Məsələ ilə bağlı “Operativ Media”ya açıqlama verən hüquqşünas Şamil Paşayev bildirib ki, İnzibati Xətalar Məcəlləsinin 96-cı maddəsinə əsasən DYP əməkdaşı yanız aşağıdakı hallarda avtomobili cərimə meydançasına apara bilər:
Sürücüdə və onunla birlikdə olan sərnişinlərdən hər hansı birində nəqliyyat vasitəsini idarə etmək hüququ və ya nəqliyyat vasitəsinə sahiblik hüququ olmadığı zaman;
Nəqliyyat vasitəsinin dövlət qeydiyyat nişanları və ya onlardan biri olmadıqda, yaxud saxta və ya qeyri-standart olduqda və ya nəqliyyat vasitəsini başqa nəqliyyat vasitəsinə verilmiş dövlət qeydiyyat nişanı ilə idarə edildiyi zaman;
Avtomobilin mühərrik, ban və şassi nömrəsi nəqliyyat vasitəsinin qeydiyyat şəhadətnaməsindəki rəqəmlərə uyğun gəlmədiyində;
Avtomobil alkoqoldan, narkotik vasitələrdən, psixotrop maddələrdən və ya güclü təsir edən digər maddələrdən istifadə edən şəxs tərəfindən idarə olunduqda. Bu zaman kifayət qədər dəlil olmalıdır. Eyni zamanda sürücü ilə birlikdə gedən sərnişinin nəqliyyat vasitəsini idarə etmək hüququ olmadıqda;
Nəqliyyat vasitəsində xüsusi normativ tələblər pozulmaqla avadanlıq quraşdırıldıqda;
Xüsusi çoxavazlı səs və sayrışan işıq cihazları ilə təchiz edildikdə; (Bu pozuntuları yerində aradan qaldırmaq mümkündürsə, maşın cərimə meydançasına aparıla bilməz).
Məhkəmənin və ya müvafiq icra hakimiyyəti orqanının varsa, inzibati cərimə barədə qərar 2 ay müddətində icraat edilmədikdə (Bu halda sürücü cəriməni yerində ödəyərsə maşın cərimə meydançasına aparıla bilməz).
Vətəndaş cəriməni ödəyib və ya avtomobilin saxlanma səbəbi aradan qaldırıldıqdan sonra lazımi sənədləri polisə təqdim edir. Bu zaman maşın cərimə meydançasından çıxarılır.
Hüquqşünas vətəndaşın cərimə meydançasında avtomobilə ziyan dəydiyi halda təzminat ala biləcəyini bildirib:
Avtomobilə əgər cərimə meydançasında müəyyən ziyan dəyərsə, vətəndaş məhkəməyə müraicət edə bilər. Bununlada maşına dəyən ziyanla bağlı təzminat ala bilər.
Son olaraq qeyd edək ki, avtomobil İnzibati Xətalar Məcəlləsinin 96-cı maddəsində göstərilən qaydalardan kənarda cərimə meydançasına aparıla bilməz. Belə halla qarşılan vətəndaş uxarı səlahiyyətli orqana və ya məhkəməyə müraciət edə bilər.
Gülcahan Məmmədova
