Aİ Azərbaycan və Ermənistan arasındakı son gərginliklə bağlı bəyanat yayıb

"Aİ dünən Ermənistan-Azərbaycan sərhədində Teq bölgəsində bir neçə erməni və azərbaycanlı hərbçinin həlak olması və ya yaralanması ilə nəticələnən silahlı toqquşmalardan təəssüflənir".

"Operativ Media" xəbər verir ki, bu barədə Aİ-nin bəyanatında deyilir.

"Bu hadisə bir daha vurğulayır ki, müəyyən edilmiş sərhəd olmadığı halda, 1991-ci il xəttinə hörmət edilməli, hər iki tərəfin qüvvələri bu xəttdən təhlükəsiz məsafələrə çəkilməlidir ki, oxşar hadisələrin baş verməməsi üçün.

Əvvəlki öhdəliklərə, o cümlədən 1991-ci il Almatı Bəyannaməsinə uyğun olaraq ərazi bütövlüyünün qarşılıqlı tanınması ilə bağlı 2022-ci ilin oktyabrında Praqada əldə edilmiş öhdəliklərə əməl edilməlidir. Aİ həmçinin sərhədin delimitasiyası ilə bağlı danışıqların intensivləşdirilməsini tələb edir və bu prosesi dəstəkləməyə hazırdır.

Biz təmkinli olmağa və bütün mübahisələrin sülh yolu ilə həllinə çağırışlarımızı təzələyirik. Aİ bu səyləri, o cümlədən ən yüksək səviyyədə, həmçinin Aİ-nin Ermənistandakı missiyasının iştirakı ilə dəstəkləməyə davam edir".